ރޯދަ މަހަކީ ޤުރުއާންގެ މައްސަރެވެ. ނަމަވެސް އަޅުގަނޑުމެންގެ ގޭގޭގައި ހުންނަ ބޮޑެތި ޓީވީތަކާއި، ގޭމިންގ ކޮންސޯލްތަކާއި، މިއުޒިކް އާލަތްތަކަކީ އަޅުކަމަށް އޮތް އެންމެ ބޮޑު ހުރަހެވެ.
ގޭގައި މިއުޒިކް ޖެހުން ހުއްޓާލާށެވެ. ބޭކާރު ވަގުތު ދުއްވާ ގޭމުތަކާއި ފިލްމުތައް މި މަހަށްޓަކައި ދޫކޮށްލާށެވެ.
ރޯދަ މަހު ގޭތެރެއަށް ރަހުމަތާއި ބަރަކާތް ވަންނަން އެދޭނަމަ، މަލާއިކަތުން ވަނުމަށް މަނާކުރާ ތަކެތި ގޭތެރެއިން ނެރެންޖެހެއެވެ. އޭގެ ތެރޭގައި ޖަނަވާރު ނުވަތަ އިންސާނުންގެ ބުދުތަކާއި، ފާރުގައި ހަރުކޮށްފައި ހުންނަ ފުރާނަ ހުރި ތަކެތީގެ ފޮޓޯތައް ހިމެނެއެވެ.
ކުރަންވީ ކަމެއް: ގޭގެ ސިޓިންގ ރޫމް ޗެކްކޮށްލާށެވެ. ކަބަޑުތައް ސާފުކޮށް، މިފަދަ ތަކެތި ނަގާށެވެ.
ހައިރާންވެދާނެއެވެ. ނަމަވެސް ބަދިގެއިން އުކާލަންވީ، ނުވަތަ މަދުކުރަންވީ "އިސްރާފު" އެވެ. ރޯދަ މަހަށް ތައްޔާރުވުމުގެ ނަމުގައި އަހަރެމެން ގޭތެރެ ފުރާލަނީ ކާބޯތަކެތިންނެވެ. މިއީ ރޯދައިގެ ރޫޙާ ޚިލާފު ކަމެކެވެ.
އެމެރިކާގެ މަޝްހޫރު ޢިލްމުވެރިޔާ ޝެއިޚް ޔާސިރް ޤާޟީ ވަނީ "ރޯދަ މަހަކީ 'ފާސްޓިންގ' (ހައިހޫނުކަމުގެ) މަހެއް. 'ފީސްޓިންގ' (ކައިބޮއި މަޖާކުރުމުގެ) މަހެއް ނޫނެވެ. އަހަރެމެންގެ އަންހެން ކަނބަލުން ދުވާލު ހަތަރުދަމު ބަދިގޭގައި ހޭދަކޮށް، ރޭގަނޑު ވަރުބަލިވެގެން ތަރާވީޙް ނުކުރެވޭ ހިސާބަށް ދިއުމަކީ ހިތާމަހުރި ކަމެއް.. ބަދިގެއިން އިސްރާފު ނެރެލާ. އާދައިގެ ކެއުމަކަށް ބަދަލުކޮށްލުން،" މުހުންމު ކަމަށެވެ.
ފްރިޖާއި ކަބަޑުތައް ސާފުކޮށް، މުއްދަތު ހަމަވެފައިވާ ތަކެތި އުކާލާށެވެ. އަދި ބޭނުންވާ ވަރަށްވުރެ އިތުރަށް ހުރި ތަކެތި ސަދަގާތްކޮށް، ގޭތެރެއަށް ލުއިކަން ގެންނާށެވެ.
މި ރޯދަ މަހަކީ ތަފާތު މަހަކަށް ހަދަން ބޭނުންނަމަ، މިއަދުން ފެށިގެން މި ތިން ކަންތައް ގޭތެރެއިން ސާފުކޮށްލާށެވެ. އޭރުން ގޭތެރޭގައި އުފެދޭނީ އަޅުކަމުގެ މާހައުލެކެވެ.
