މި މަޝްރޫއުގެ ސަބަބުން ރާއްޖެއަށް ފަތުރުވެރިކަމުގެ އިތުރުން އެހެން ދާއިރާތަކަށް އިގުތިސާދު ފުޅާކުރުމުގެ ފުރުސަތު ލިބޭނެ ކަމަށް ސަރުކާރުން ގަބޫލުކުރެ އެވެ. މުސްތަގުބަލުގެ މާލީ ދާއިރާ ގާއިމުކޮށް، ތަފާތު ބޭނުންތަކަށް ބޭނުންކުރެވޭ ސަރަހައްދެއްގެ ޒަރީއާއިން، އިންޑިއާ ކަނޑުގެ ސަރަހައްދުގައި އެންމެ ފާހަގަކޮށްލެވޭ މާލީ މަރުކަޒުގެ ގޮތުގައި ދިވެހިރާއްޖެ ގާއިމުކުރެވޭނެ ކަމަށް ވެސް ސަރުކާރުން ދެކެ އެވެ.
ރައީސް އޮފީހުން މިއަދު ބޭއްވި "ޕްރެސާ ވިތު ދަ ސްޕޮކްސް"ގައި ނޫސްވެރިއަކު އެ މަޝްރޫއުއާ ގުޅޭގޮތުން ސުވާލު ކުރުމުން މުންދު ވިދާޅުވީ މަޝްރޫއު ކުރިއަށް ގެންދާ ކުންފުނިން މަޝްރޫއުގެ ސްކޯޕަށް ބަދަލެއް ގެނެސްފައިވާ ކަމަށެވެ.
ސަރުކާރުން ކުރިން ބުނެފައިވާ ގޮތުގައި އެ ސެންޓަރުގެ މަސައްކަތް 2030 ވަނަ އަހަރު ނިންމުމަށް ރާވާފައިވާއިރު، އެ މަޝްރޫއުގެ މަގްސަދަކީ ފުރަތަމަ ހަތަރު އަހަރުގެ ތެރޭގައި ރާއްޖޭގެ ގައުމީ އުފެއްދުންތެރިކަމުގެ ނިސްބަތް ފާހަގަކުރެވޭ މިންވަރަށް އިތުރުކުރުމާ އެކު، ފަސް ވަނަ އަހަރާ ހަމައަށް އެއް ބިލިއަން އެމެރިކާ ޑޮލަރަށް ވުރެ މަތީ އާމްދަނީއެއް ހޯދުމެވެ.
މޯލްޑިވްސް އިންޓަނޭޝަނަލް ފައިނޭންޝަލް ސެންޓަރު (އެމްއައިއެފްސީ) ވާނީ ތަރައްގީވެފައިވާ ގައުމަކަށް ރާއްޖެ ބަދަލުވާން ދިއުމުގެ މައި ބިންގާކަމަށް ރައީސް މުހައްމަދު މުއިއްޒު ވަނީ މީގެ ކުރިން ވިދާޅުވެފަ އެވެ.
މަޝްރޫއުގެ ދަށުން ހަދާ ތަންތަން
އެމްބީއެސް ގްލޯބަލް އިންވެސްޓްމަންޓްސް އިން ބުނީ އެމްއައިއެފްސީގެ ނަމުގައި ގާއިމުކުރާ ސެންޓަރު ހަދަނީ ޖުމްލަ 780،000 އަކަމީޓަރުގެ ސަރަހައްދެއްގައިކަމަށެވެ. ފަސް އަހަރުގެ ތެރޭގައި ހަދާ އެ ސެންޓަރު ހަދަން ނިންމާފައިވަނީ 6،500 އަށް ވުރެ ގިނަ މީހުންނަށް ދިރިއުޅެވޭނެ ގޮތަށްކަމަށެވެ. އަފި އެ ތަނަށް އަދި ދުވާލަކު 35،000 މީހުން ޒިޔާރަތްކުރާނެ ކަމަށް އެ ކުންފުނިން ބުނެއެވެ.
