އެކައުންޓުތައް ފްރީޒް ކުރަން ކުރި އަމުރު ހައި ކޯޓުގައި އިސްތިއުނާފް ކުރުމުން އެ ކޯޓުން ވެސް ވަނީ އެކައުންޓުތައް ދޫކޮށްލުމަށް އަމުރުކޮށްފަ އެވެ. އަދި އެ މައްސަލަ ދައުލަތުގެ ފަރާތުން ސުޕްރީމް ކޯޓުގައި އިސްތިއުނާފް ކުރުމުން، އެ ކޯޓުން މިއަދު ނިންމީ ޔާމީނާ އެއްކޮޅަށެވެ.
ސްޕްރީމް ކޯޓުން ބުނެފައި ވަނީ އިސްލާމިކް ބޭންކުގައި އޮތް ޔާމީންގެ އަށް އެކައުންޓް ހިފަހައްޓަން އެދުނީ އެކްސްރޯ އެކައުންޓަށް ޖަމާކުރި އެއް މިލިއަން ޑޮލަރާ ގުޅިގެން ނަމަވެސް އެ އަށް އެކައުންޓާ އެ މުއާމަލާތްތަކާ ގުޅުމެއް އޮތް ކަމަށް ދައުލަތަށް ދެއްކިފައި ނުވާ ކަމަށެވެ.
އެކަމަށް ރިއާޔަތް ކުރައްވާ އަދުރޭ ކުރެއްވި ޓްވީޓެއްގައި ވިދާޅުވީ ކޯޓުން މިއަދު ނިންމެވި ނިންމެވުމުން އެނގެނީ ރައީސް ޔާމީނުގެ މައްޗަށް ސިޔާސީ ދައުވާތަކެއް އުފުލާފައިވާކަން ކަމަށެވެ. އަދި ވަގުތުން އެމަނިކުފާނު މިނިވަން ކުރުމަށް ވެސް ގޮވާލެއްވި އެވެ.
އެމްއެމްޕީއާރްސީގެ ބޮޑު ހިޔާނާތުގެ ތެރެއިން ދައުލަަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރި ކަމަށް ޔާމީންގެ މައްޗަށް ސާބިތުވެ އަންނަނީ ފަސް އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.
އެ މައްސަލައިގެ އިތުރުން އަދި ދެ ދައުވާއެއް އެމަނިކުފާނާ ދެކޮޅަށް ވަނީ އުފުލާފަ އެވެ. އެއީ ރ. ފުއްގިރި ކުއްޔައް ދޫކުރުމުގެ މުއާމަލާތާއި ގުޅިގެން އުފުލާފައިވާ ރިޝްވަތު ގަބޫލުކުރުމުގެ ދައުވާ އާއި މަނީ ލޯންޑްރިންގެ ކުށުގެ ދައުވާ އެވެ.
