މި މައްސަލަ މިއަދު ސިޓީއަކުން މިނިސްޓްރީއަށް ހުށަހަޅާފައިވަނީ ރައްޔިތުންގެ އިއްތިހާދުގެ ފަރާތުންނެވެ.
އެ ޖަމިއްޔާއިން އިސްލާމިކް މިނިސްޓްރީއަށް ފޮނުވި ސިޓީގައި ބުނެފައިވަނީ ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރާ ގާނޫނުގެ ފަސްވަނަ މާއްދާގެ އިޖުމާލީ މަފްހޫމާ ސީދާ ދެކޮޅަށް ގައިރު މުސްލިމުންގެ ޝިއާރު ފާޅު ކުރުމާއި އަދި އެ ކުށަށް އަރައިގަތުމަށް އެހެން މީސްތަކުންނަށް ހިތްވަރު ލިބޭ ގޮތަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވާހަކަ ދައްކަވާފައިވާ ކަމަށެވެ.
އޭގެ އިތުރުން އަދާލަތު ޕާޓީގެ ކުރީގެ ރައީސް ހުސައިން ރަޝީދު އަހްމަދު މީޑިއާ މެދުވެރިކޮށް ކްރިސްމަސް ފާހަގަކުރުމަށް ތާއީދުކޮށް ވާހަކަދެއްކެވި ކަމަށާއި، ރައްޔިތުންގެ މެދުގައި އޮތް އިސްލާމީ ވަހްދަތު ގެއްލި ދީނީ ބައިބައިވުން އުފެދޭނެ ގޮތަށް ވާހަކަ ދައްކާފައިވާ ކަމަށް ވެސް އެ ސިޓީގައި ބުނެފައި ވެއެވެ.
ރައްޔިތުންގެ އިއްތިހާދުން ބުނެފައިވަނީ މިއީ "އެމްޑީއެން އަދި އުތެމައިން ނެރުނު ރިޕޯޓުގައި ގޮވާލާފައިވާ ކަންކަމަށް މަގު ކޮށުމުގެ ގޮތުން އެހެން ދީންތަކުގެ ކަންކަން ފާހަގަކުރުން ދިވެހި ރައްޔިތުންގެ މެދުގައި ނޯމަލައިޒް" ކުރުމުގެ ބޭނުމުގައި ކުރާ ކަމަކަށް ވާތީ މި މައްސަލަ ތަހުގީހު ކުރަން އެދޭ ކަމަށެވެ.
މި މައްސަލައިގެ ބާވަތުންނާއި، އެ ދެ ފަރާތުގެ މަގާމާއި ހައިސިއްޔަތުގެ ގޮތުން އެ ދެ ފަރާތުގެ ނާޖައިޒް ސިޔާސީ ނުފޫޒުގެ އަސަރު ފޯރުމުގެ ފުރުސަތު ތަނަވަސްކަމުން، މަގާމާއި މަސްއޫލިއްޔަތުން ރައީސް ނަޝީދާއި ޝޭހު ހުސެން ރަޝީދު މިވަގުތު އެކަހެރިކޮށް ދިނުމަށް ވެސް އެ ސިޓީގައި އެދިފައި ވެއެވެ.
