މި އިވެންޓުގައި ޗައިނާގެ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގް ލިޒޯންގްގެ އިތުރުން ޗައިނާ އެމްބަސީގެ އިސްވެރިން ވެސް ބައިވެރިވެ ވަޑައިގަތެވެ.
ނަމަވެސް، މި އިވެންޓުގައި ޗައިނާ ސަރުކާރަށް ތައުރީފު ކުރައްވަމުން ގޮސް އެންމެފަހުން މިނިސްޓަރު ވަނީ އިންޑިއާއަށް ވެސް ވަރަށް ބޮޑަށް ތައުރީފު ކުރައްވާފައެވެ.
ޗައިނާއާއި އިންޑިއާ އަކީ އެކި ގޮތްގޮތުން ވާދަވެރިކަން ބޮޑު ދެ ގައުމެވެ. އަދި ދިވެހިރާއްޖެއަށް އެކި ގޮތްގޮތުން އެހީވުމުގައި ވެސް އިންޑިއާއި ޗައިނާއިން ގެންދަނީ ވާދަވެރިކަން ދައްކަމުންނެވެ.
މިއަދުގެ އިވެންޓުގައި މިނިސްޓަރު އިންޑިއާއި ގުޅޭގޮތުން ވާހަކަ ދައްކަވަމުން ވިދާޅުވީ، އިންޑިއާގައި އުފައްދާ ކޮވިޝީލްޑް ވެކްސިން އެކްސްޕޯޓުކުރުމަށް ދަތިތަކެއް ހުރި ހަމަވެސް، އެ އެއްވެސް ދަތިކަމަކާއި ނުލައި ރާއްޖެއަށް ވެކްސިން ލިބޭނެކަމަށެވެ.
އެގޮތުން އިންޑިއާއިން ދިވެހިރާއްޖެއަށް އިތުރު ދެ ލައްކަ ޑޯޒް ވެކްސިން ލިބޭނެކަމުގެ ޔަގީންކަން ލިބިފައިވާކަން ވެސް މިނިސްޓަރު އިއުލާނު ކުރެއްވީ، ޗައިނާއިން ދިވެހިރާއްޖެއަށް ވެކްސިން ހަދިޔާކުރުމަށް ބޭއްވި އިވެންޓުގައެވެ.