ސީއެންއެމްއިން ކުރި ސުވާލަކަށް ޖަވާބުދެއްވަމުން ޑރ.މުއިއްޒު ވިދާޅުވީ މިމަސްތެރޭގައި ހުޅުމާލޭގައި އެޅުމަށް ހަަމަޖެހިފައިވާ ވެހިކަލް ޕާކްކުރާ އިމާރާތުގެ މަސައްކަތް ނިންމުމަށް ހަމަޖެހިފައިވާކަމަށެވެ.
އަދި މި އިމާރާތަކީ 500 އަށްވުރެ ގިނަ ވެހިކަލްއަށް ޕާކްކުރެވޭގޮތަށް ހަދާ ތަނެއްކަމަށާއި، މިއަހަރުތެރޭގައި މި ޕްރޮޖެކްޓު ނިންމުމަށް ހަމަޖެހިފައިވާކަމަށް ޑރ.މުއިއްޒު ވިދާޅުވިއެވެ.
ޕާކިންއަށް ދިމާވެފައިވާ ދަތިތަކުގެ ވާހަކަދައްކަވަމުން ޑރ.މުއިއްޒު ވަނީ ހުޅުމާލޭގައި ދިރިއުޅޭ މީހުންވެސް އަމިއްލަ ގެދޮރުގައި ޕާކްކުރަން ޖާގަ ނެތުމުން މަގުމަތީގައި ވެހިކަލް ޕާކްކުރާކަން ފާހަގަކުރައްވާފައެވެ.
ހުޅުމާލޭގައި ކުރިއަށްދާ މިމަސައްކަތާއިއެކު ގިނަ ބަޔަކަށް ޕާކްކުރުމަށް އެތަނުގައި ރަޖިސްޓްރީ ކުރުމުގެ ފުރުސަތު ލިބިގެންދާނެކަމަށް ޑރ.މުއިއްޒު ވަނީ ވިދާޅުވެފައެވެ.
އަދި އެ އިމާރާތުގައި ސީސީޓީވީގެ ހިދުމަތް ހުންނާނެކަން ފާހަގަކުރައްވައި ޑރ.މުއިއްޒު ވިދާޅުވީ ރައްޔިތުންނަށް ވެހިކަލް ޕާކުކުރުމަށް ރައްކާތެރި ޖާގައެއް ލިބިގެންދާނެކަމަށެވެ.