އެމްއެމްޕީއާރުސީއިން މިއަދު ބުނީ، ކޮވިޑް-19ގެ ބަލިމަޑުކަމާއި ޖީއޮޕޮލިޓިކަލް ހަމަނުޖެހުންތަކުގެ ސަބަބުން ކުރިމަތިވެފައިވާ ގޮންޖެހުންތަކާ އެކުވެސް މިއަހަރުގެ ރާއްޖެއަށް ޒިޔާރަތްކުރާ އެއް މިލިއަން ވަނަ ފަތުރުވެރިޔާއަށް މާދަމާ މަރުހަބާ ކިޔޭނެކަމަށް އެންމެފަހުގެ ތަފާސްހިސާބުތަކުން ދައްކާ ކަމަށެވެ. 

މިއީ ރާއްޖެއިން ފަތުރުވެރިކަމުގެ ސިނާއަތް ކުރިއެރުވުމަށް ކުރަމުން އަންނަ ބުރަ މަސައްކަތުގެ ފޮނި ނަތީޖާ ކަމަށާއި، މިއީ ދުނިޔޭގެ ގައުމުތަކުގެ މެދުގައި ރާއްޖޭގެ މަގުބޫލުކަން އިތުރުވަމުން އަންނަ ކަމުގެ ހެއްކެއް ކަމަށްވެސް އެމްއެމްޕީއާރުސީއިން ވަނީ ބުނެފަ އެވެ. 

މިކަމާއި ގުޅިގެން އެމްއެމްޕީއާރުސީގެ ސީއީއޯ އަދި އެމްޑީ ތޮއްޔިބު މުހައްމަދު ވަނީ ބައިނަލްއަގުވަމީ ގޮތުން ކުރިމަތިވި އެކި ގޮންޖެހުންތަކާއެކު ވެސް މި ކާމިޔާބީ ހަގީގަތަކަށް ހެދުމުގައި ޝާމިލްވި ހުރިހާ ފަރާތްތަކަށް ތައުރީފު ކުރައްވާ، ޝުކުރުއަދާކުރައްވާފަ އެވެ.

މިއަހަރުގެ ކުރީކޮޅު ރައީސް އިބްރާހީމް މުހައްމަދު ސޯލިހު ވަނީ 2022 ވަނަ އަހަރު ރާއްޖެއިން 6.1 މިލިއަން ފަތުރުވެރިންނަށް މަރުހަބާ ކިއުމަށް ލަނޑުދަނޑި ކަޑައަޅާފައިވާކަން އިއުލާން ކުރައްވާފަ އެވެ.

2 ވަނަ އަހަރުގެ ޖުލައި 31 ގެ ނިޔަލަށް 136،828 ފަތުރުވެރިންނާއެކު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރީ އިންޑިއާއިންނެވެ. ރާއްޖެއަށް 2 ވަނަ އަށް އެންމެ ގިނައިން ފަތުރުވެރިން އައި މާކެޓެއްގެ ގޮތުގައި އޮތީ 109،926 ފަތުރުވެރިންނާއެކު އިނގިރޭސިވިލާތެވެ. ތިން ވަނައިގައި 101،409 ފަތުރުވެރިންނާއި އެކު އޮތީ ރަޝިއާ އެވެ.