”ތައްޔާރު“ ޖަހާފައިވާ ޕާޓީގެ ސްލޯގަން އަކާއިއެކު އަލީ ސޯލިހު މިއަދު ކުރެއްވި ޓުވީޓެއްގައި ވަނީ، ޖޭޕީގެ ޓިކެޓުގައި ނިކުމެ ”ބުރަކަށިމަތީ ހިނގައި“ މެމްބަރުކަން ލިބުމުން ބައެއް މެމްބަރުން ޕާޓީން ވަކިވާކަން ފާހަގަކޮށްފަ އެވެ.
އަދި އެއަށްފަހު މެމްބަރުކަމުގެ ގޮނޑި ހޯއްދެވީ ވެސް ޖޭޕީގެ އެހީތެރިކަމާއިއެކު ނޫން ކަމަށް ވިދާޅުވެ، ބައެއް މެމްބަރުން ވާހަކަދައްކަވާކަން، [ވަކި މެމްބަރެއްގެ ނަން ފާހަގަނުކޮށް] އަލީ ސޯލިހު ކުރެއްވި ޓުވީޓުގައި ވެއެވެ.
އެގޮތަށް އެވާހަކަ ދައްކަވާ މެމްބަރުން މެމްބަރުކަމުން އިސްތިއުފާ ދެއްވުމަށްފަހު އަލުން ގޮނޑި ހޯއްދެވުމަށް މަސައްކަތް ކުރުމަށް އޭނާ ވަނީ ގޮވާލާފައެވެ. އަލީ ސޯލިހު ވިދާޅުވީ، ޖޭޕީ އާއި ޕާޓީގެ ލީޑަރު ގާސިމް އިބްރާހިމްގެ ބާރު އަދިވެސް ދައްކާނެ ކަމަށް ވެސް ވިދާޅުވެފައެވެ.
މިފަދަ ގޮތަކަށް ޖޭޕީގެ ތަރުޖަމާން ޓުވީޓުކުރައްވާފައިވާއިރު، އެ ޕާޓީގެ ޓިކެޓުގައި މަޖިލީހުގެ މެމްބަރުކަމުގައި ހުންނެވި، އަލަށް އުފެއްދި މޯލްޑިވްސް ނެޝަނަލް ޕާޓީ(އެމްއެންޕީ) ގެ ރައީސް މުހައްމަދު ނާޒިމް ވަނީ، ރޭ ބޭއްވި އެޕާޓީގެ ފުރަތަމަ ކޮންގްރެސްގައި ރާއްޖޭގައި ހިންގައި ސިޔާސީ ޕާޓީތަކުގެ ސިޔާސަތުތަކަށް ފާޑު ވިދާޅުވެފަ އެވެ.
ނާޒިމް ވިދާޅުވީ، ރާއްޖޭގައި ސިޔާސީ ޕާޓީތައް ހިންގަނީ ވަކި ބަޔެއްގެ މަސްލަހަތު ހިމާޔަތް ކުރަން ކަމަށާއި، އެމްއެންޕީން ނިކުމެތިބީ އެ ސިޔާތު ބަދަލުކުރަން ކަމަށެވެ. އެގޮތުން މުޅި އުމުރު ޕާޓީގެ ލީޑަޝިޕްގައި އެކަކު ހުރުމުގެ ފުރުސަތު އެ ޕާޓީން ނުދޭނެ ކަމަށް ވިދާޅުވި އެވެ.
މިފަހަރުގެ ރިޔާސީ އިންތިހާބުގައި އެމްއެންޕީގެ ފަރާތުން ވާދަކުރައްވާނެ ކަން ވެސް އިއުލާންކުރައްވާފައިވާ ނާޒިމް އަކީ މީގެ ކުރިން ޖޭޕީގައި މުހިންމު މަގާމުތަކެއް ފުރުއްވާފައިވާ، ޕާޓީއަށް ގިނަ ހިދުމަތްތަކެއް ކުރެއްވި ގާސިމްގެ އަރިސް ބޭފުޅެކެވެ.
ޖޭޕީގެ ލީޑަރު ގާސިމްގެ އެޑްވައިޒަރުގެ މަގާމުން އޭނާ އިސްތިއުފާ ދެއްވާފައިވަނީ، 2019 ވަނަ އަހަރުގެ ނޮވެމްބަރު މަސްތެރެއެވެ. އަދި އޭގެފަހުން ޖޭޕީގެ ޕާލިމެންޓްރީ ގުރޫޕްގެ ނައިބް ލީޑަރު ކަމުގައި ހުންނެވުމަށްފަހު، ޕާޓީން ވަކިވެ ސެޕްޓެމްބަރު މަސްތެރޭ ވަނީ އަމިއްލަ ޕާޓީއެއް އުފައްދަވާފަ އެވެ.
މި ޕާޓީ އުފެއްދެވީ ނާޒިމްއާއި ކުރީގެ ޕޮލިސް ކޮމިޝަނަރު އަދި މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒް އިސްކޮށް ތިއްބަވައިގެން ނެވެ.
ޖޭޕީގެ ޓިކެޓުގައި މިހާރުވެސް މެމްބަރުކަން ކުރައްވަމުންދާ، އެމްއެންޕީގެ ލީޑަރު، ރިޔާޒަކީ ވެސް ގާސިމްގެ ވަރަށް އަރިހުގައި މަސައްކަތް ކުރެއްވި ބޭފުޅެކެވެ. އޭނާ ޖޭޕީން ވަކިވީ އެމްއެންޕީ އުފެއްދެވުމަށް 2021 ވަނަ އަހަރުގެ ޖުލައި މަސްތެރެ އެވެ.
ޕާޓީން ވަކިވުމަށްފަހު، ރިޔާޒާއި ނާޒިމުގެ ބައެއް ވާހަކަތަކާއި ހިތްހަމަ ޖެހިވަޑައިނުގެން މީގެ ކުރިން ގާސިމްވެސް ވަނީ، އެ ދެބޭފުޅުންގެ ތެރެއިން ކޮންމެ ބޭފުޅެއްގެ ކެމްޕެއިނަށް 4-5 މިލިއަން ރުފިޔާ ހަރަދުކޮށްފައިވާނެ ކަމަށް ވިދާޅުވެފަ އެވެ.
