ސަރުކާރަށް ހަތަރު އަހަރު ފުރުމުގެ މުނާސަބަތުގައި ދައުލަތުގެ މީޑިއާއަށް މިނިސްޓަރު އައިޝަތު ދެއްވި އިންޓަވިއުއެއްގައި ވިދާޅުވީ، އަރަބިއްޔާ ސްކޫލު 2024 ގައި ހުޅުވިގެންދާނީ ”ބާރަބަރު“ ސްކޫލެއްގެ ގޮތުގައި ކަމަށެވެ.
އަރަބިއްޔާ ބަދަލުކުރުމަށް ސަރުކާރުން ނިންމާފައިވަނީ ބާ ޖަމާލުއްދީން ތަޅާލުމަށްފަހު އެތަނުގައި އަޅާ އާ އިމާރާތަށެވެ.
އަރަބިއްޔާގެ އާ އިމާރާތެއްގެ މަސައްކަތް ސަރުކާރުން ފެށީ އެތަނުގައި ދަރިވަރުންނަށް ކިޔަވައިދިނުން ރައްކާތެރި ނޫން މިންވަރަށް ރެދުލައި ސްކޫލު ބާވެފައިވާކަމުގެ ކަންބޮޑުވުން ބެލެނިވެރިން ކުރަން ފެށުމުން ނެވެ.
އަރަބިއްޔާ މަޝްރޫއުއަކީ އަމީން ކޮންސްޓްރަކްޝަނާއި ހަވާލުކޮށްގެން 420 ދުވަސްތެރޭ އެމަސައްކަތް ނިންމާގޮތަށް ކުރިއަށްދާ މަޝްރޫއުއެކެވެ. އެންމެ ފަހުން ސަރުކާރުން ބުނެފައިވާގޮތުގައި އެތަނުގައި މިހާރު ކުރިއަށްދަނީ އަރަބިއްޔާ އަޅާ ބިމުގައި ހުރި ބާޖަމާލުއްދީން ތަޅާލުމުގެ މަސައްކަތެވެ. އެމަސައްކަތް ނޮވެމްބަރު މަހުގެ ފަހުކޮޅަށް ނިމޭނެ ކަމަށް ވަނީ ލަފާކޮށްފަ އެވެ. އެމަސައްކަތަކީ 168 މިލިއަނަށްވުރެ ގިނަ ރުފިޔާ ބަޖެޓުކޮށްގެން ކުރިއަށްދާ މަސައްކަތެކެވެ.
ސަރުކާރުން ބުނާގޮތުން، އަރަބިއްޔާ ނިމޭއިރު ކުރީގެ އަރަބިއްޔާއަަށްވުރެ މާ ފުރިހަމަވެފައި ޖާގަވެސް ތަނަވަސްވާނެ އެވެ.
އެގޮތުން:
- އަރަބިއްޔާގެ ކުރީގެ އިމާރާތުގައި 26 ކްލާސް ރޫމު ހުރިއިރު އަލަށް އަޅާ އިމާރާތުގައި 41 ކްލާސް ރޫމް ހުންނާނެ
- ބާ އަރަބިއްޔާގައި ހުރީ 44 ފާހާނަ، އާ އިމާރާތުގައި 110 ފާހާނަ ހުންނާނެ
- ބާ އަރަބިއްޔާގައި ހުރީ ތިން ލެބް، އާ އިމާރާތުގައި ހަތަރު ލެބް ހުންނާނެ
- އިންޑޯ ގާޑަންއެއްް އިތުރުކުރެވޭނެ
- ބާ އަރަބިއްޔާގައި ދެ ސްޓާފް ރޫމް، އާ އިމާރާތުގައި ހަތަރު ސްޓާފް ރޫމް
- ބާ އިމާރާތުގައި ހުރީ ދެ އެޑްމިން ބްލޮކް، އާ އިމާރާތުގައި ތިން ބްލޮކް
- ބާ އިމާރާތުގައި ހުރީ ދެ ލިފްޓު، އާ އިމާރާތުގައި ހަތަރު ލިފްޓު
- އެކްޓިވިޓީ އޭރިއާގެ ފަސް އޭރިއާ ހުންނާނެ
- ރީޑިން އޭރިއާގެ ދެ އޭރިއާ ހުންނާނެ