ވަޒީރު ޒަމީރު މި މުޒާހަރާގައި ބައިވެރިވެ ވަޑައިގަތީ އިޒްރޭލުގެ ޕާސްޕޯޓު މަނާކޮށް، އެ ގައުމުގެ ފަތުރުވެރިން ރާއްޖެ އައުން މަނާކުރަން ގޮވާލައި މަޖިލީސް ކައިރީގައި ފެށި މުޒާހަރާގެ ބައިވެރިން އެ އިދާރާ ދޮށަށް ދިއުމުންނެވެ.
ވަޒީރު ޒަމީރު ނިކުމެ ވަޑައިގެން ފަލަސްތީނުގެ ރައްޔިތުންނަށް ދެމުންގެންދާ އަނިޔާ ހުއްޓާލުމަށް ގޮވާލައްވާފައެވެ.
އަދި ނޫސްވެރިން ކުރި ސުވާލުތަކަށް ޖަވާބުދެއްވަމުން، ޔަހޫދީ އިޒްރޭލުން ފަލަސްތީނުގައި ހިންގަމުންދާ ގަތުލްއާންމާއި ގުޅިގެން ރާއްްޖެއިން އަމަލުކުރަމުންދާ ގޮތުގެ ތަފްސީލް ޒަމީރު ހިއްސާކުރެއްވި އެވެ.
މިނިސްޓަރު އެމޭރުމުން ވާހަކަ ދައްކަވަނިކޮށް، "ސީޒް ފަޔާ ނައު - ހަމަލާ ދިނުން މިހާރު ހުއްޓައިލާ އޭ.." ކިޔައި މުޒާހަރާގެ ބައިވެރިން އަޑު އުފުލަން ފެށި އެވެ. ޖަވާބުގައި މިނިސްޓަރު ވެސް ވިދާޅުވީ "ސީޒް ފަޔާ ނައު އިނގޭތޯ އަޅުގަނޑުގެ ސްޓޭންޑަކީ ވެސް،" އެވެ.
މިދިޔަ މަހުގެ 7 ގައި ހަމާސް އިން އިޒްރޭލަށް ދިން ހަމަލާއާ ގުޅިގެން ގާޒާއާ ދެކޮޅަށް ޔަހޫދީ އިޒްރޭލުން ފަށާފައިވާ އުދުވާނާއި ގުޅިގެން ދިވެހިން ދަނީ އިޒްރޭލު މީހުން ރާއްޖެ އައުން މަނާ ކުރަން ގޮވާލައި ސަރުކާރަށް ޕްރެޝަރު ކުރަމުންނެވެ.
- އިތުރަށް ކިޔާލަން: އަޅުވެތިކަމާ ދެކޮޅަށް ޖިހާދު ކުރާ ހަމާސް ބާކީކޮށް، ނައްތާނުލެވޭނެ: ނަޝީދު
ޔަހޫދީ އިޒްރޭލު ސިފައިން ގާޒާއަށް މިހާރު ދެމުންދާ ލާއިންސާނީ ހަމަލާތަކުގައި މިހާތަނަށް 13،000 އަށްވުރެ ގިނަ މީހުން ޝަހީދުވެފައިވާ ކަމަށް ރިޕޯޓުތައް ބުނެފަ އެވެ.
