ހޯމްލޭންޑު މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމެއްގައި ކަސްޓަމްސްގެ ކޮމިޝަނާ ޖެނެރަލް ޔޫސުފް މާނިއު މުހައްމަދު ވިދާޅުވި ގޮތުގައި، ބޮޑެތި ވިޔަފާރިވެރިންގެ ކޮންޓެއިނާތައް އެމްޕީއެލް ސަރަހައްދުގައި ކްލިއާކުރުމުގެ ބަދަލުގައި ތަޅެއް އެޅުވުމަށް ފަހު ސީދާ ވިޔަފާރިވެރިންގެ ސައިޓް ތަކަށް ގެންގޮސް، އެތަނަށް ކަސްޓަމްސްގެ އޮފިސަރަކު ފޮނުވައިގެން ކްލިއާ ކުރާ ގޮތަށް ހަމަ ޖައްސާފައިވާ ކަމުގަ އެވެ.
މާނިއު ވިދާޅުވީ އެގޮތަށް ކަން ކުރުމުގެ ސަބަބުން އަވަސް ގޮތަކަށް އެމްޕީއެލް ބަނދަރު ވަރަށް ބޮޑަށް ހުސްވެ ޖާގައިގެ ދަތިކަމަށް ހައްލެއް ލިބިގެންދާނެ ކަމަށެވެ. އެއާއެކު ކުދި ވިޔަފާރި ތަކަށް ވެސް އަވަހަށް ކޮންޓެއިނާތައް ކްލިއާ ކުރުމަށް ފުރުސަރު ފަހި ވެގެން ދާނެ ކަމަށް އޭނާ ވިދާޅުވި އެވެ.
މީގެއިތުރުން މުދާ ކްލިއާކުރުމުގެ މަރުހަލާގެ ހުރިހާ ހިދުމަތްތަކެއް އެއްކޮށް ޑިޖިޓަލައިޒް ކޮށް، އެއްވެސް ކަރުދާހެއް ހުޅަހަޅަން ނުޖެހޭ ގޮތަށް ހަދަން ނިންމާފައިވާ ކަމަށް މާނިއު ވިދާޅުވި އެވެ.
މާނިއު ވިދާޅުވީ އެކަންކަން ޑިޖިޓަލައިޒް ކުރުމުން ކަސްޓަމްސް އޮފިސަރާއި ސީދާކޮށް ދިމާ ނުވާނެ ކަމަށާއި، މުދާ ކްލިއާ ކުރުމުގެ މަރުހަލާގައި ކޮރަޕްޝަންގެ އަމަލުތައް ހިނގުންވެސް އެއާއެކު މަދުވާނެ ކަމަށް އޭނާ ފާހާގަ ކުރެއްވި އެވެ. އެގޮތުން ވަކި ބައެއްގެ އެއްޗެހި ކުރިން ކްލިއާ ކުރުމުގެ މައްސަލަތަކަށް އެކަމުން ހައްލެއް ލިބިގެންދާނެ ކަމަށް އޭނާ ވިދާޅުވި އެވެ.