ދުބާއީގައި ބާއްވާ ރާއްޖޭގެ އިންވެސްޓްމަންޓް ފޯރަމް ފެށުމުގެ ކުރިން މިއަދު ނޫސްވެރިންނާ ބައްދަލުކުރައްވައި މިނިސްޓަރު ވިދާޅުވީ، މި ސަރުކާރުން ވެރިކަމާއި ހަވާލުވިއިރު ރާއްޖޭގެ އިގްތިސާދީ އަދި މާލީ ހާލަތު އޮތީ ވަރަށް ނާޒުކު ފައްތަރެއްގައި ކަމަށެވެ. ނަމަވެސް އެ ހާލަތުން އަރައިގަތުމަށް އެއްވެސް ބައެއްގެ އުނގަށް ވެއްޓެން ނުޖެހޭނެ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އިގްތިސާދު ނަގަހައްޓަން ކުރަންޖެހޭ ވަރަށް ގިނަ މަސައްކަތްތަކުގެ ފުރަތަމަ މަރުހަލާތައް ނިމިފައިވާ ކަމަށާއި، ސަރުކާރުން އިއުލާންކޮށްފައިވާ އެސްއީޒެޑްގެ ބޮޑެތި މަޝްރޫއުތަކުގެ މަސައްކަތްތައް ވެސް މާ ގިނަ ދުވަހެއް ނުވެ ފެށޭނެ ކަމަށެވެ.
މޯލްޑިވްސް އިކޮނޮމިކް ގޭޓްވޭގެ ނަމުގައި ކުރިއަށް ގެންދާ އެ މަޝްރޫއުގެ ދަށުން ބަންކަރިންގެ ހިދުމަތްތައް ދިނުމާއި މުދާ ގެނެސް ބަހައްޓާ ގުދަން ކުރާ ޖާގަ ދިނުމަށް ބޭނުންވާ ތަންތަން ވެސް ހެދިގެން ދާނެ ކަމަށް މިިނިސްޓަރު ފާހަގަ ކުރެއްވި އެވެ.
މީގެއިތުރުން ރައީސްގެ ވައުދުފުޅާއި އެއްގޮތަށް ރާއްޖޭގައި ޑިވެލޮޕްމަންޓް ބޭންކެއް ގާއިމްކުރުމަށްޓަކައި ކުރަންޖެހޭ މުހިންމު ކަންކަން ވެސް ކުރަމުން ގެންދަވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އެކަމުގައި ބޮޑެތި ފަންޑުތަކުގެ އެހީއަށް އެދޭއިރު މާލީގޮތުން ދެފުށް ފެންނަ ސިޔާސަތެއް ގެންގުޅުން މުހިއްމު ކަމަށެވެ. އަދި ރޭޓިން އެނމެ ރަނގަޅު ނޫން ކަމުގައި ވިއަސް ބޭންކުތަކުގެ ފުރިހަމަ އެއްބާރުލުން ލިބުމަކީ ފެހި ސިގްނަލެއް ކަމަށް މިނިސްޓަރު ފާހަގަ ކުރެއްވި އެވެ.