ރާއްޖޭގެ ސިޔާސީ މައިދާނުގައި އެންމެ މަގުބޫލު އެއް ޝަހުސިއްޔަތު ކަމަށްވާ ނަޝީދު އިންޑިޔާއަށް ވަޑައިގެންނެވީ، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ ހައިސިއްޔަތުން އިންޑިޔާގައި އޮންނަ ބައެއް ބައްދަލުވުންތަކަށެވެ. އެމަނިކުފާނު އިންޑިޔާއަށް ވަޑައިގެންނެވުމުގެ ކުރިން ޑުބާއީގައިވެސް ބައެއް ބައްދަލުވުންތައް ބޭއްވެވި އެވެ.
ރައްޔިތުންގެ މަޖިލީހުގެ މައްޗަންގޮޅި މެދު ދައިރާގެ މެންބަރުގެ ގޮތުގައި ވެސް ހުންނެވި ނަޝީދު މިހާރު ދިރިއުޅުއްވަނީ ގާނާގެ ސިޓީއެއް ކަމަށްވާ އަކްރާގައެވެ. އަކްރާގައި އެމަނިކުފާނު ކުރައްވަމުން ގެންދަވާ މަސައްކަތްޕުޅަކީ، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލް މަސައްކަތްޕުޅުތަކެވެ.
ރައީސް ނަޝީދު އެންމެ ފަހުން ރާއްޖެ ވަޑައިގަތީ މާލޭގެ މޭޔަރު އިންތިހާބާ ދިމާކޮށް ޑިމޮކްރެޓްސްގެ ކެންޑިޑޭޓް ސައިފް ފާތިހަށް ތާއިދު ހޯއްދެވުމަށެވެ. އޭގެ ފަހުން އެ މަނިކުފާނު މާލެ ވަޑައިގެންކަމެއް އެނގިފައެއް ނުވެއެވެ.
ރައީސް ޑރ. މުއިއްޒު ވެރިކަމާއި ހަވާލުވުމަށްފަހު ރާއްޖޭގައި ތިބޭ އިންޑިއާ ސިފައިން ފޮނުވާލުމުގެ އަމަލީ މަސައްކަތް ފެށުމާއި އެކު ރާއްޖެ އިންޑިއާގެ ގުޅުން ވަނީ ހީނަރުވެފަ އެވެ. ރައީސް ނަޝީދަކީ އިންޑިއާގެ މިހާރުގެ ސަރުކާރު ދިފާއުކުރެއްވުމާއިއެކު އިންޑިއާ ރާއްޖެ ގުޅުމަށް އަބަދުވެސް ވަކާލާތުކުރައްވާ ބޭފުޅެކެވެ.
- އިތުރަށް ކިޔާލަން: އިންޑިޔާގެ ބޮޑު ވަޒީރާއި ދިމާލަށް ހިތުހުރި އެއްޗެއް ގޮވީމަ ވާނީ ގޯސް: ނަޝީދު