މިދިޔަ ސަރުކާރުން މާލޭގެ ރައްޔިތުންނަށް ދޫކުރި ފްލެޓާއި ގޯތި މައްސަލާގައި ހައުސިން މިނިސްޓަރު ޑރ. އަލީ ހައިދަރު މަޖިލީހަށް ހާޒިރުކޮށް، ކުރި ސުވާލުތަކަށް ދެއްވި ޖަވާބާ މެދު ހިތްހަމަނުޖެހިގެން އެމްޑީޕީގެ މެމްބަރުން ވަނީ އިހްތިޖާޖްކޮށްފަ އެވެ.
މަޖިލީހުގެ ޖަލްސާގައި މެންބަރުން އިހުތިޖާޖު ކުރައްވަން ފެއްޓެވީ ވައިކަރަދޫ ދާއިރާގެ މެންބަރު ހުސައިން ޒިޔާދު ކުރެއްވި ސުވާލަކަށް ވަޒީރު ޖަވާބުނުދެއްވާ ކަމަށް ވިދާޅުވެ ނިޒާމީ ނުކުތާއެއް ނެންގެވުމުން އެއީ މަޖިލީހުގެ ނިޒާމާ ގުޅުންހުރި މައްސަލައެއް ނޫންކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވުމާ ގުޅިގެންނެވެ.
ޖަލްސާ ހޫނުވެ، ރިޔާސަތުން ވަނީ އެމްޑީޕީގެ ހަތަރު މެންބަރުންގެ ނަން އިއްވައި ޖަލްސާ ދޫކޮށް ދާން އަމުރުކޮށްފަ އެވެ.
ނަން އިއްވި މެންބަރުންނަކީ ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ނާޒިލް އާއި ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓޭ) އާއި ކެންދޫ ދާއިރާގެ މެންބަރު މައުރޫފް ޒާކިރާއި ކެޔޮދޫ ދާއިރާގެ މެންބަރު މުހައްމަދު ނިއުޝާދެވެ.
އެމްޑީޕީގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމުގައި ނާޒިލް ވިދާޅުވީ މަޖިލިސް މެންބަރުންގެ ޒިންމާއަކީ އަދި އެމްޑީޕީގެ މަޖިލިސް މެންބަރުން މަސައްކަތް ކުރަނީ ވެސް ރައްޔިތުންގެ ހައްގުތައް ރައްކާތެރިކޮށް، ސަރުކާރު ޖަވާބުދާރީކުރުވަން ކަމަށެވެ. ނަމަވެސް އެ މަސައްކަތް ކުރަން ސަރުކާރުން، އެމްޑީޕީގެ މެމްބަރުންނަށް ހުރަސްއަޅަމުންދާ ކަމަށް ނާޒިލް ވިދާޅުވި އެވެ.
އޭނާ ވިދާޅުވީ، މިއަދުގެ ޖަލްސާގައި މެންބަރު ޒިޔާދުގެ ނަން އިއްވައި މަޖިލީހުން ބޭރުކުރަން ޖެހުމަކީ ރިޔާސަތުން ކޮށްގެންވާނެ ކަމެއް ނޫން ކަމަށް އެޕްޑީޕީގެ މެންބަރުން ގަބޫލުކުރައްވާ ކަމަށެވެ. އަދި، ރިޔާސަތުގެ ކުރިމަތީގައި އަޑުގަދަކުރުމަށް ޒިޔާދާ އެކުގައި ބައިވެރިވީ ޒިޔާދުގެ ނަން އިއްވުމަކީ ރިޔާސަތުން ކޮށްގެންވާނެ ކަމެއް ނޫން ކަމަށް ގަބޫލުކުރައްވާތީކަން ނާޒިލް ވަނީ ފާހަގަކުރައްވާފަ އެވެ.
މި ބައްދަލުވުމުގައި ވާހަކަ ދައްކަވަމުން ޒިޔާދު ވިދާޅުވީ ކުރީ ސަރުކާރުން ނެރުނު ފުލެޓު ލިސްޓު ސަރުކާރުން މުރާޖައާކުރާއިރު ގޯތީގެ ލިސްޓު މުރާޖައާނުކުރައްވަނީ ކީއްވެގެންތޯ ކުރެއްވި ސުވާލަށް މިނިސްޓަރު ޖަވާބު ދެއްވާފައި ނުވާ ކަމަށެވެ.
އެތައް ހާސް ބަޔަކު ގޯއްޗާއި ފްލެޓްގެ އިންތިޒާރުގައި ތިބިއިރު، އެ ސުވާލުތަކުގެ ޖަވާބު ރައްޔިތުން ބޭނުންވާކަން އޭނާ ފާހަގަކުރެއްވި އެވެ. އެހެންވެ، އަޑުގަދަ ކުރަން ޖެހުނީ ނިޒާމުގެ ތެރެއިން ފުރުސަތު ހޯދަން އުޅެ އެ ފުރުސަތު ނުދިނުމުންކަމަށެވެ. ނަމަވެސް މިނިސްޓަރު ކަން ކުރެއްވީ ބުލީ ކުރާ އުސޫލުން ކަމަށް އޭނާ ތުހުމަތު ކުރެއްވި އެވެ.
މަޖިލީހުގެ މިއަދުގެ ޖަލްސާގައި މެމްބަރުންގެ ސުވާލުތަކަށް ޖަވާބު ދެއްވަމުން ވެސް މިނިސްޓަރު ހައިދަރު ކަންބޮޑުވުން ފާޅުކުރެއްވީ ކުރީގެ ސަރުކާރުން ބިންތައް ރައްޔިތުންނަށް ދީފައިވާ ގޮތުންނެވެ. އޭނާ ވިދާޅުވި ގޮތުގައި، ހުޅުމާލެ 2 އިން ވެސް ބިންތައް ދޫކޮށްފައި ވަނީ މަގުތަކަށް އަރާ ގޮތަށާއި އެކި ކުންފުނިތަކުން ސާމާނުތައް ބަހައްޓާފައި ހުރި ތަންތަނުންނެވެ. އަދި ކަނޑުންނާއި ފަޅުން ވެސް ގޯތިތައް ދީފައިވާއިރު، އެ ތަންތަނަށް ގޯތި ނުކިޔޭނެ ކަމަށް ހައިދަރު ވިދާޅުވި އެވެ.
މިނިސްޓަރު ވިދާޅުވީ، ބިންވެރިޔާ ސްކީމުގެ ދަށުން ހުޅުމާލެ ދެވަނަ ފިޔަވަހިން ދޫކުރި ހުރިހާ ގޯތިތައް އެ ތަންތަނުގެ ވެރިފަރާތްތަކާ އަންނަ އޮކްޓޫބަރު މަހުގެ ނިޔަލަށް ހަވާލުކޮށް ނިމޭނެ ކަމަށެވެ.
