މި ބިލް މަޖިލީހުން ފާސްކޮށްފައިވަނީ 2024 އޮގަސްޓް 22 ގައެވެ.
މި ބިލަކީ ކައުންސިލަތަކަށް ލިބިފައިވާ ބިން ޕްލޭންކުރުމާއި ބޭނުންކުރުމުގެ އިހްތިޔާރު އެއްކޮށް ކަޑާލެވި މިނިސްޓްރީ ތަކުގެ ބާރުގެ ދަށަށް ގެނެވިގެންދާނެކަމަށް ވިދާޅުވެ އެކަމުގެ ކަންބޮޑުވުން ބައެއް ކައުންސިލްތަކުން ވަނީ ފާޅުކޮށްފައެވެ.
ސަރުކާރުން ބުނީ ބިނާވެށި ޕްލޭންކުރުމާއި ހިންގުމުގެ ޤާނޫނުގެ މައިގަނޑު މަޤުސަދުތަކުގެ ތެރޭގައި އިޤްތިސާދީ އަދި އިޖްތިމާޢީ ގޮތުން އެކަށީގެންވާ ގޮތެއްގައި ރާއްޖޭގެ ބިން ތަރައްޤީކޮށް ބެލެހެއްޓޭނެ ފަދައަކުން، ބިނާވެށި ޕްލޭންކުރުމަށް މަގުފަހިކުރުން ކަމަށެވެ. އަދި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ތަރައްޤީކުރުމަށް މަގުފަހިވާނެ ގޮތަކަށް ބިނާވެށި ޕްލޭންކޮށް ހިންގުމާގުޅޭ އުސޫލުތައް ކަނޑައެޅުންވެސް މި ޤާނޫނުގެ މަޤުސަދުތަކުގެ ތެރޭގައި ހިމެނޭކަމަށްވެސް ސަރުކާރުން ބުނެއެވެ.
އިތުރަށް ކިޔާލުމަށް : ކައުންސިލްތަކަށް ލިބޭ ބާރު މާދަމާ މަޖިލީހުން ކަނޑާލަނީ، އައްޑޫ މޭޔަރުގެ ކަންބޮޑުވުން
ބިނާވެށި ޕްލޭންކުރުމާއި ހިންގުމާބެހޭ ޤައުމީ ސިޔާސަތު ކަނޑައަޅާނީ، ވަޒީރުންގެ މަޖިލީހުގެ ލަފާގެމަތިން ރައީސުލްޖުމްހޫރިއްޔާއެވެ. މި ޤާނޫނުގެ ދަށުން ބިނާވެށި ޕްލޭންތައް އެކުލަވައިލައި، އެ ޕްލޭންތައް ފާސްވުމަށްފަހު، އެ ޕްލޭންތައް ތަންފީޒުކުރެވެމުންދާ ގޮތް ބެލުމާއި، ޕްލޭނާ އެއްގޮތްވާ ގޮތުގެމަތިން ބިން ތަރައްޤީކުރުމުގެ ހުއްދަތައް ދިނުމުގެ މަސްއޫލިއްޔަތު ވަކި އިދާރާތަކާއި މި ބިލުން ހަވާލުކުރެއެވެ.
މަސްއޫލިއްޔަތުތައް ހަވާލުކުރާ އިދާރާ
1. ހައުދިން މިނިސްޓްރީ
2. ސިޓީ ކައުންސިލް
3. ރަށު ކައުންސިލް
4. އާބަން ސަރަޙައްދުތައް ޕްލޭންކުރުމަށް ކަނޑައަޅާ އިދާރާތައް
5. ސިނާއީ ސަރަޙައްދުތައް ޕްލޭންކުރުމަށް ކަނޑައަޅާ އިދާރާތައް
6. އިޤްތިސާދީ ހާއްސަ ސަރަޙައްދުތައް ޕްލޭންކުރުމަށް ކަނޑައަޅާ އިދާރާތައް.
ދިވެހިރާއްޖޭގައި އެއްވެސް ބިމެއް ތަރައްޤީކުރެވޭނީ، މި ޤާނޫނުގައި ބަޔާންކޮށްފައިވާ ގޮތުގެމަތީން ބިން ތަރައްޤީކުރުމުގެ ހުއްދަ ހޯދުމަށްފަހުގައިކަމާއި، މި ޤާނޫނުގެ ދަށުން ދޫކުރާ ބިން ތަރައްޤީކުރުމުގެ ހުއްދައާއި އެ ހުއްދައިގައި ކަނޑައަޅައިފައިވާ ޝަރުޠުތަކާއި މުއްދަތުތަކާ އެއްގޮތަށް އަދި މި ޤާނޫނާއި މި ޤާނޫނުގެ ދަށުން ހަދާ ގަވާއިދުގައި ކަނޑައަޅައިފައިވާ ތަރައްޤީކުރުމުގެ މިންގަނޑުތަކާ އެއްގޮތަށް، ހުއްދަ ދޫކުރެވުނު ފަރާތުން ޢަމަލުކުރަންވާނެކަމަށް ޤާނޫނުގައި ބަޔާންކޮށްފައިވެއެވެ.
އިތުރަށް ކިޔާލުމަށް : އާބަން ޑިވެލޮޕްމަންޓް ބިލާމެދު އެމްޑީޕީގެ ކަންބޮޑުވުންތަކެއް
މި ޤާނޫނުގެ ދަށުން ހަދަންޖެހޭ ގަވާއިދުތައް، މި ޤާނޫނަށާމް ޢަމަލުކުރަން ފަށާ ތާރީހުން ފެށިގެން ގިނަވެގެން 6 މަސް ދުވަހުގެ ތެރޭގައި ހަދައި، ދިވެހިސަރުކާރުގެ ގެޒެޓުގައި ޝާއިއުކުރަންޖެހެއެވެ.. މި ޤާނޫނަށް އަމަލުކުރަން ފަށާނީ މިއަދުން ފެށިގެން 6 މަސްދުވަސް ހަމަވާ ތާރީހުގައެވެ.
