މުއްގަނޑު ފެލާލާފައި، ދުއްވާ ވެހިކަލްތަކަކީ މިއަދު މި ގައުމުގެ ރައްޔިތުންނަށް އޮތް ބޮޑު ނާމާންކަމަށާއި ބިރުވެރިކަމަކަށް މިވަނީ ވެފަ އެވެ. މަގުތައް މައްޗަށް އަމާންކަމާއި އެކު ނިކުމެލެވެން ނެތްއިރު، ސަލާމަތުން އެނބުރި ގެއަށް ވަދެވޭނޭ ކަމާއި މެދުވެސް މިވަނީ ސުވާލު އުފެދިފަ އެވެ.
ތުއްތު ދަރިފުޅު ގޮވައިގެން ހަވީރު ފިންޏަށް ހިނގާލަން، ބުރުޖަހާލަން ނިކުމެ، ސަލާމަތުން އެނބުރި ގެއަށް އާދެވޭނޭ ކަމުގެ އެއްވެސް އުންމީދެއް ނޯވެ އެވެ. ދަރިފުޅު ސްކޫލަށް ލާން ގޮސް އެނބުރި ގެއަށް އާދެވޭނޭ ކަމުގެ އެއްވެސް އުންމީދެއް، ޔަގީންކަމެއް ނޯވެ އެވެ. ގައުމުގެ ރައްޔިތުން އުޅެން ޖެހިފައި މިވަނީ މިފަދަ ބިރުވެރި، ނާމާކަމުން ފުރިގެންވާ ވެއްޓެއްގަ އެވެ.
މަތީގައި މި ފާހަކޮށްލީ ދާދި ފަހުން ވަރަށް ގާތްގާތުގައި ހިނގާދިޔަ ނުރައްކާތެރި، ދެ އެކްސިޑެންޓްގެ ވާހަކަ އެވެ. ދެ ޒުވާނެއްގެ ފުރާނަ ގެއްލިގެން ދިޔަ ހިތާމަވެރި ހާދިސާގެ ވާހަކަ އެވެ. އުންމީދުން ފުރުގެންވާ ދެ ޒުވާނުންނެވެ. މުސްތަގުބަލުގައި ކުރި ފޮނި އުންމީދުތަކުގެ ކުލަވަރު ނުޖެހެނީސް، "ބާރު ސްޕީޑު"ގެ ސިކާރައަކަށްވެ މި ފަނާވަނިވި ދުނިޔެއާ އަލްވަދާއުކިޔަން ޖެހުނީ އެވެ. ހުރި ހިތާމައެއްގެ ބޮޑު ކަމާއެވެ.
މިފަދަ އެކްސިޑެންޓް ތަކުން ގެއްލެނީ ހަމައެކަނި ފުރާނައެއް ނޫނެވެ. ދިރިތިބި އެތަކެއް އާއިލާއެއް ބިކަވެ، ނިކަމެތިވެގެންވެސް ދެއެވެ. ބަލިމަޑުކަމުގައި ބާރު ސްޕީޑުގައި، މުއްގަނޑު ފެލާލާފައި، ،މަގުތަކުގެ ހޭބޯ ނާރާ ދުއްވުމުގެ ސަބަބުން، އިއްޔެ މެންދުރު ގަދަވެ ސަލާމަތުން ތިބި އެތައް ބައެއް މިއަދު ބަލި އެނދުގައި، އަނެއްބަޔަކު އަސާގަނޑުގެ އެހީގައި، އަނެއް ބަޔަކު ފުރޮޅުލީ ގޮނޑީގައި ތިބޭމަންޒަރު ފެންނަނީ މަދެއްކޮށެއް ނޫނެވެ.
ތަފާސްހިސާބިތައް ދައްކާ ގޮތުގައި މިފަދަ އެކްސިޑެންޓްތައް ގިނައިން ހިނގާފައި ހުންނަނީ ނޫކަށި ފުރައިގެ ޒުވާނުންގެ "ބާރު ސްޕީޑު"ގެ އިހުމާލުންނެވެ. ބާރަށް ވެހިކަލް ދުއްވުމުގެ ސަބަބުން ހިނގާ މިފަދަ އެކްސިޑެންޓުތަކުގައި ހައްޔަރުކުރެވި އަދަބު ދެވިފައި ހުންނަނީ ވެސް ގިނައިން ޒުވާނުންނަށެވެ.
ފުލުހުންގެ ތަފާސްހިސާބުތަކަށް ބަލައިރު، މި އަހަރުގެ މިހާތަނަށް، ޖުމުލަ 1951 ޓްރެފިކް އެކްސިޑެންޓް ހިނގާފައިވެ އެވެ. އެއީ ނިމިދިޔަ 2023 ވަނަ އަހަރު ހިނގި އެކްސިޑެންޓް ތަކަާއި އަޅާ ބަލާއިރު، އެތައް ގުނައެއް އިތުރު އަދަދެކެވެ. އޭގެ ތެރެއިން ގިނަ އެކްސިޑެންޓު މާލެ ސަރަހައްދުގައި ހިނގިއިރު 125 މީހަކަށް އަނިޔާވެ، ފަސް މީހަކު މަރުވި އެވެ.
މި އަހަރު އެންމެ ގިނަ އެކްސިޑެންޓް ހިނގާފައި ވަނީ މާޗު މަހު އެވެ. އެ މަހު އެކަނި 300 އަށް ވުރެ ގިނަ އެކްސިޑެންޓެއް ރާއްޖޭގައި ހިނގި އެވެ. އެހެން މަސްތަކުގައި އެވްރެޖްކޮށް 200 އަށް ވުރެ ގިނަ އެކްސިޑެންޓް ވަނީ ހިނގައިފަ އެވެ. ގިނަ އެކްސިޑެންޓުތައް ހިނގަން މެދުވެރިވެފައިވަނީ ގަވާއިދާއި ހިލާފަށް "ބާރު ސްޕީޑު"ގައި ދުއްވުމުގެ ސަބަބުންނެވެ.
އެކްސިޑެންޓްވި ކާރެއް: ޓްރެފިކް ގަވައިދުތައް ތަންފީޒުކުރަން ގިނަ އަދަދެއްގެ ފުލުހުންނާއި ވަގުތު އެކަމަށް ބޭނުންވޭ
ރާއްޖޭގައި އެކްސިޑެންޓް ތައް ހިނގުމަށް ދިމާވާ އެންމެ މައިގަނޑު ސަބަބަކީ ސްޕީޑް ބާރުކޮށް ވެހިކަލް ދުއްވުމެވެ. އެއީ އެންމެންވެސް ގަބޫލުކުރާނެ ހަގީގަކެވެ. ދެން އުފެދޭ ސުވާލަކީ އާންމު މިންގަނޑުތަކާއި ހިލާފަށް ސްޕީޑް ބާރުކޮށް ދުއްވައިގެން ކުށްވެރިވެގެން ގާނޫނުގެ ކުރިމައްޗަށް ގެންނަ މީހާއަށް އެއްވެސް އަދަބެއް ނުލިބި، އަނެއް ދުވަހު ހަމަ އެއަށްވުރެ ބާރަށް ދުއްވަން ފުރުސަތު ލިބެނީ ކީއްވެބާވަ އެވެ.
މިއީ ރާއްޖޭގައި މި ހިނގާ އެކްސިޑެންޓާއި ގުޅޭ ގޮތުން މަގުމަތިން ކޮށްލި ސުވާލަކަށް ބައެއް އާންމުން ދީފައިވާ ޖަވާބެވެ. ބާރު ސްޕީޑުގައި ދުއްވުން، ކަމާބެހޭ އިދާރާތަކުން ހުއްޓުވައި ދިނުމަށް މިއަދު ވަރަށް ގައުމު އެދެއެވެ. އަދި ބާރު ސްޕީޑުގައި ދުއްވުމަކީ ތިމާ އާއި އެހެން މީހުންނަށް ވެސް ހުރި ނުރައްކަލެއްކަން ގަބޫލުކޮށް، އަމިއްލަ ޒިންމާ އަދާކުރުމަށް ގައުމުގެ ދުލުން އެދި އެބަ ގޮވަ އެެވެ.
ހުޅުމާލޭގައި ޓްރެފިކް ބަލަހައްޓަން ފުލުހަކު ހަރަކާތްތެރިވަނީ: އެކްސިޑެންޓްތައް އިތުރުވާން ފެށުމުން ފުލުހުން ވަނީ ހާއްސަ އޮޕަރޭޝަނެއް ފަށާފައި --- ފޮޓޯ/ޕޮލިސް
ރާއްޖޭގައި އެއްގަމު އުޅަނދު ދުއްވުމުގެ ގަވާއިދުގައި އެންމެބާރުމިނުގައި އުޅަނދު ދުއްވޭނީ ކިހާ ބާރު ސްޕީޑެއްގައިކަން ކަނޑައެޅި ބަޔާންވެގެންވާއިރުވެސް، އެވަރަކުން ނުފެދެ އެވެ. ޒުވާނުންނަށް ސްޕީޑު ބަރުކޮށް ދުއްވުމަށް އެއްވެސް ލިމިޓެއް ބޭނުން ނުވާކަހަލައެވެ.
އެކަމުގެ ނަތީޖާއެއްގެ ގޮތުން އެކްސިޑެންޓުތައް ގިނަވެ، އެތައް ބައެއްގެ ފުރާނަ ގެއްލި، އެތަކެއްގެ ބައެއް ދާއިމީ ނުކުޅެދުންތެރިކަމަށް ގޮސްފައިވަނީ މަދަކުން ނޫނެވެ.
އެކްސިޑެންޓުތަކުގައި އުޅަނދު ދުއްވާ މީހުން ކަމާއިބެހޭ ފަރާތްތަކުގެ ބެލުމުގެ ދަށަށް ނުވަތަ ހައްޔަރަށް ގެނެވުނު ނަމަވެސް ގިނަފަހަަރަށް ހެއްކާއި ގަރީނާ ނެތި ބާރު ސްޕީޑުގައި ދުއްވި ޑްރައިވަރަށް ދައުވާ އެއް ކުރެވޭނެ ފުރުސަތެއް ނެތި ދޫކޮށްލެވޭތަން އަންނަނީ މަދެއްކޮށެއް ނޫނެވެ. މިހެންވުމުގެ ސަބަބުން އަނެއްކާ ވެސް އެފަދަ މީހުން އުޅަނދުތަކަށް އަރައި، ބާރު ސްޕީޑުގައި މަގުތަކުގައި ދުއްވަނީ އެވެ.
އަޅުގަނޑު ގަބޫލުކުރާ ގޮތުގައި ސްޕީޑު ބާރަށް ސައިކަލް ދުއްވުމަކީ އާދައިގެން ވިސްނުމެއްގައި ހުރެ އެއްވެސް މީހަކު ކޮށްފާނޭކަމެއް ނޫނެވެ. ހަމަ ބުއްދީގެ ނަޒަރަކުން ވިސްނާލައިފި ނަމަ، އެއީ މުޅިން އެހެން ކަމެއްގެ އަލާމާތެއްކަަށް ވުން ގާތެވެ. ބައެއް މީހުން ހީކުރާ ގޮތުގައި މުއްގަނޑަށް ފެލާލާފައި ބާރަށް ދުއްވުމަކީ އެއީ ގަޓުވުމެކެވެ. ނުވަތަ މޮޅު ކަމެކެވެ. އެފަދަ މީހުންނަށް އެހެން ހީވިޔަސް އެއީ ގަޓުވުމެއް ނޫނެވެ. އަދި ކިއެއްތަ އެއީ މޮޅުކަމެއްވެސް ނޫނެވެ. ގިނަ ބަޔަކު ގަބޫލުކުރާ ގޮތުގައި އެއީ ބޮޑު ބަލިމަޑުކަމެއްގެ އަލާމާތެކެވެ.
