ބޯޅަ ފަހާ ނުދުވެ، ރެފްރީން ފަހާ ދުވުން
ރާއްޖޭގައި ފުޓުބޯޅައަކީ ބޯޅަ ފަހާ ދުވުމުގެ ބަދަލުގައި، ރެފްރީ ފަހާ ދުވާ ކުޅިވަރަކަށް ބަދަލު ވެއްޖެ އެވެ. މެޗެއްގެ ހަގީގީ ނަތީޖާއަކީ މިހާރު ކަށަވަރު ކުރެވޭ ކަމެއް ނޫނެވެ. އެކި ގޮތްގޮތުން މެޗުގެ ނަތީޖާ ބަދަލު ކުރެވެއެވެ. ރެފްރީން، މެޗް ނިންމާ، ސަލާމަތުން ގެއަށްދެވޭނެކަމާމެދު ޝައްކު ކުރެއެވެ. ރެފްރީންނަށް ބިރުދައްކައެވެ. ރެފްރީން "ކޮށާލާނެ" ކަމުގެ އިންޒާރު ދެއެވެ.
އެސޯސިއޭޝަން ވެފައި މިއޮތީ "ދަތްނެތް ސިންގާ" އަކަށެވެ. ރާއްޖެއަށްވެސް "މެޗް ފިކްސިން" ގެ ވަބާ ފޯރީ އެވެ. ފިކުރު ހުސްވެ، ހަކަތަ ހުސްވެ ދިވެހި ފުޓުބޯޅައިގެ ފިކުރުވެސް ހުސްވެއްޖެފަދަ އެވެ.
މިހާރު ކަން އޮތް ގޮތަކީ، މިހާލަތުން އަރައިގަނެވޭނެ މަގުޗާޓެއް، އެސޯސިއޭޝަނަށް ނުދެއްކުނުތާ، ވަޒީރަށް ވެސް، ފަހުމުވާގޮތް ނުވެ އެވެ. ކުޅިވަރަށް އިންގިލާބީ ބަދަލެއް ގެންނަވާނެކަމަށް ވަޒީރު، ހަރުު އަޑުން ވިދާޅުވެ އެވެ. އެހެންނަމަވެސް ވަޒީރުގެ ގިނަވަގުތު ހޭދަވަނީ، މަޖިލިސް މެމްބަރުންނަށް ދަނޑު އަޅާދެއްވުމުގައި އެވެ.
ކުރީ ސަރުކާރުން މިސަރުކާރަށް ވާރުތަވި ފަހުގެ ކުޅިވަރު ގާނޫނަށް އަމަލެއް ނުކުރައްވަ އެވެ. ރައީސް ޔާމިންގެ 2015 ވަނަ އަހަރުގެ ކުޅިވަރު ގާނޫނުން ކުޅިވަރުގެ ރަނގަޅު މަފްހޫމްތަކެއް ތައާރަފް ކުރެއްވި އެވެ. ސްޕޯޓްސް ކޮމިޝަނަރެއްގެ ދަށަށް ކުޅިވަރު ކްލަބްތައް ގެންނަން ނުޖެހުނު ނަމަވެސް، މިކަންވެސް ކުރެއްވި އެވެ. ނެޝަނަލް ސްޕޯޓްސް އެސޯސިއޭޝަންތަކުގެ ދައުރު ތަފްސީލްކުރެއްވި އެވެ. ކުޅިވަރު އިންފްރާސްޓްރަކްޗަ ގާއިމް ކުރަން ސްޕޯޓްސް ކޯޕަރޭޝަނެއް އުފެއްދެވި އެވެ. ކުޅިވަރަށް ހާއްސަ ޓެލެވިޒަން ޗެނެލްއެއްވެސް އުފެއްދެވި އެވެ. ކުޅިވަރު ގާނޫނަކީ ޒަމާނީ ފެންވަރަށް ކުޅިވަރު އުފުލާލުމުގެ ނިޔަތުގައި ފާސްކުރި ގާނުނެއްކަމަށް ވީނަމަވެސް، ހަމަ މިސަރުކާރެކޭ އެއްފަދައިން، އެސަރުކާރުންވެސް އެގާނޫނު ތަމްފީޒުކުރީ ފާޑެއްގެ ގޮތަކަށެވެ.
ނަތީޖާއަކަށް ވީ، މިއަދުވެސް ފުޓުބޯޅަ ދަނޑަށްް ފެންޖަހާ މީހުނަށްވުރެ ބެލުންތެރިން މަދުކަމެވެ. އެސޯސިއޭޝަންގެ ރައީސް އަބަދުވެސް ވިދާޅުވަނީ، "ތަމެން ތިޔާ ހަދަނީ ހަމަރަގަޅަށް" ކަމަށް، ފީފާ އިން ބުނާކަމަށެވެ.
އެހެންނަމަވެސް ފުޓުބޯޅަ މެޗެއް ސަހަލުގޮތުގައި ނިންމާލެވެނީ މަދުފަހަރަކު އެވެ. އެންމެ ފަހުން ރެފްރީންވެސް ދުވެ ފިލީއެވެ. މިހާރު ރެފްރީން ގެންނަނީ ބޭރުން ނެވެ.
މިފަދަ ލަދުވެތިހާލަކަށް އެފްއޭއެމް ވެއްޓުމަކީ، ފުޓުބޯޅައަށް ލޯބިކުރާ ދިވެހިންނާއި، ކުރީގެ ފުޓުބޯޅަ ތަރިންވެސް، އެކަމާ އިންތިހާއަށް ދެރަވެ، ގޮތް ހުސްވެފައިވާކަމެކެވެ.
ނޭޕާލުގައި 2019 ވަނަ އަހަރު ކުރިޔަށްދިޔަ ސައުތް އޭޝިއަން ގޭމްސްގައި
ޔޫރޮޕިއަން ފުޓުބޯޅަ ބެލުމަށް ދިވެހިން ދީލާލީތަ؟
ކުޅިވަރު ވަޒީރު، އަހްމަދު މަހުލޫފް ވިދާޅުވަނީ، ފުޓުބޯޅައިގެ ދަނޑު ފޯރި ގެއްލުނީ، ލައިވް ޓެލެވިޒަންއިން ޔޫރޮޕިއަން ފުޓުބޯޅަ، ސިޓިންގް ރޫމްތަކަށް ލިބެން ފެށުމުން ކަމަށެވެ. މީގެ ސަބަބުން، ދިވެހި ސަޕޯޓަރުން ޑޮމެސްޓިކް ފުޓުބޯޅަ އާއި ދުރަށް ދިޔައީ ކަމަށެވެ.
މިއީ ވަރަށް ގިނަބަޔަކު ގަބޫލުކުރާ ވާހަކައެކެވެ. އެހެން ނަމަވެސް، އަޅުގަނޑަށް ބުރަވެވެނީ، މިވާހަކައަކީ ފުޓުބޯޅަ މެނެޖްމަންޓް ބަލިކަށިވެ ފިކުރު ހުސްވުމުން، އެހަގީގަތް ފޮރުވަން އުޒުރެއްގެ ގޮތުގައި ދައްކާ ވާހަކައެއް ގޮތުގަ އެވެ. މިހެން މިދެންނެވީ، ދިވެހި ކްލަބް ފުޓުބޯޅަ ބެލުމުގެ ބަދަލުގައި ޔޫރޮޕިއަން ފުޓުބޯޅަ ބެލުމަށް ގިނަ ބަޔަކު ދީލާލުމަކީ، އޭގެ ތަބީއަތުގައި ކޮންމެހެން ވާންޖެހޭކަމެއް ނޫންކަމުގައި ދެކޭތީ އެވެ.
ލިވަޕޫލް މެޗަށް ސަޕޯޓުކުރުމަށް ދިވެހީން---
ޔޫރޮޕިއްން ލީގް ތަކަކީ ދިވެހިންގެ ވެސް އެންމެ މަގުބޫލް ލީގްތައް ކަމީ ހަގީގަތެކެވެ. ދިވެހިން ޔޫރޮޕިއަން ފުޓުބޯޅަ ބަލަނީ، ދިވެހި ފުޓުބޯޅަ ބަލާ ހިތް ނުވާތީ އެއް ނޫނެވެ. ދިވެހިން، އެމީހުންގެ ތަރިން ކުޅޭތަން ބަލާހިތްވާނެ އެވެ. އެހެންނަމަވެސް، ދިވެހި ފުޓުބޯޅަ ބަލަން ކުރީން ދަނޑަށް ދިޔަ ގޮތަށް މިއަދު ދާނެ ސަޕޯޓަރުންނެއް ނެތެވެ. ސަޕޯޓަރުން ގެއްލުނީ، ކްލަބްތައް ހަރުދަނާ ކުރުމުގެ ބަދަލުގައި ކްލަބްތަކުގެ ސިޔާސީ ފައިދާނަގަން ފެށުމުން ނެވެ.
މިއާ ހިލާފަށް ޔޫރޮޕިއަން ލީގްތަކަކީ ގާނޫނީ ގޮތުން ބާރުވެރި ކުރެވި، ކްލަބް ލައިސެންސިން މެދުވެރިކޮށް، ރެގިއުލޭޓް ކުރެވިފައިވާ ކްލަބްތަކެއްގެ މައްޗަށް އެކުލެވޭ ލީގްތަކެކެވެ. ލާމަރުކަޒު ކުރެވިފައިވާ ނިޒާމެއްގެ ތެރެއިން، ވިޔަފާރި އުސޫލުން މޮޅަށް މެނެޖްކުރާ ލީގްތަކެކެވެ.
ޔޫރޮޕްގެ ކްލަބްތަކާއި ހިލާފަށް ދިވެހި ކްލަބްތައް ވަނީ ފެއިލް ވެފަ އެވެ. ރާއްޖޭގެ އަޑުކިޔާ ފުޓުބޯޅަ ކްލަބްތަކުގެ މެނެޖްމަންޓުތައް ވަނީ "ކަރަޕްޓްވެ"، "ފެއިލްވެފަ" އެވެ. ނުހިންގިފަ އެވެ.
ކްލަބްތައް ފެއިލްވީ، ސަރުކާރުން ކްލަބްތަކަށް އަޅާނުލާތީ އެވެ. ކްލަބްތައް ހަރުދަނާކުރުމަށް މަސައްކަތް ނުކުރާތީ އެވެ. ސިޔާސީ ބޭނުމަށް ނޫން ކަމަކު، ސަރުކާރުން ކްލަބްތަކާ އަޅާނުލާކަމީ އެންމެންވެސް ދަންނަ ހަގީގަތެކެވެ. ކްލަބްހިންގުމުގެ ޒަމާނީ ތައަލީމާއި ތަމްރީން ނުދީ، ރެގިއުލޭޓް ނުކޮށް، ކްލަބްތަކާ އަޅާނުލައި، ބަލިކޮށް ދޫކޮށްލާފައި އޮތުމުން ނެވެ.
ލިވަޕޫލް މެޗަށް ސަޕޯޓުކުރުމަށް ދިވެހީން---
ޔޫރޮޕިއަން ފުޓުބޯޅަ ބެލުމަކީ ދިވެހި ފުޓުބޯޅަ ނުބަލާ ސަބަބެއް ނޫން
ޔޫރޮޕިއަން ފުޓުބޯޅަ ބެލުމަކީ، އެގައުމެއްގެ ޑޮމެސްޓިކް ފުޓުބޯޅަ ނުބަލާ ސަބަބެއް ނޫންކަން، އަވަށްޓެރި އިންޑިއާއިން އެދަނީ ސާބިތުކޮށްދެމުން ނެވެ. އޫރޮޕިއަން ލީގުތައް ބަލަނީ، ޑޮމެސްޓިކް ލީގުގެ ބަދަލުގައި ނޫންކަމާއި، ޔޫރޮޕިއަން ފުޓުބޯޅައިގެ މަގްބޫލް ކަމަކީ، ޑޮމެސްޓިކް ކްލަބްތަކަށް، އެ މަގްބޫލްކަމުގެ ފައިދާ ނެގޭ ކަމެއްކަމީ މިއަދު ސްޕޯޓްސް މާކެޓިންގް ގެ ފަންނުން، ދެނެގަނެވިފައިވާ ހަގީގަތެކެވެ.
އިންޑިއާގެ ސުޕަ ލީގުގެ ފަސް ކްލަބެއް ޔޫރޮޕްގެ ލީގުތަކާއި އެކު މިފަދަ ފާޓްނަޝިޕްތައް މިހާރު އުފައްދައިފި އެވެ. މިސާލަކަށް ހައިދުރާބާދު "އެފްސީ" އާއި، ޖަރުމަނުލީގުގެ "ބޮރުޝިއާ ޑޯޓްމަންޑް" އާއި ޕާޓްނަރަޝިޕެއް އޮވެ އެވެ. "މޯހަން ބާގަން" އާއި "އެތުލެޓިކޯ މެޑްރިޑް" އާއި އެކުވެސް ޕާޓްނަޝިޕެއް އޮތެވެ. "އާރުޕީ ލައިޕްޒިގް" އާއި "އެފްސީ ގޯއާ" އާއި އުކުވެސް ފުޓުބޯޅަ ޕާޓްނަޝިޕެއް އޮވެ އެވެ.
ރާއްޖޭގައިވެސް، މާޒިޔާފަދަ ދިވެހި ކްލަބަކާއި، ޔޫރަޕިއަން ކްލަބަކާ ފުޓުބޯޅަ ޕާޓްނަރްޝިޕެއް ހެދުމަކީ ކުރެވޭނެ ކަަމެކެވެ. ޔޫރޮޕްގެ ކްލަބްތަކުން އެހެން ގައުމުތަކުގެ ކްލަބްތަކާ މިފަދަ ޕާޓްނަޝިޕް ހަދަން ބޭނުންވެ އެވެ. އިންޑިއާގައި އެދަނީ އިންޑިއަން ސުޕަ ލީގުގެ ކްލަބުތަކާއި، ޔޫރޮޕްގެ މަޝްހޫރު ކްލަބުތަކާ މިފަދަ ޕާޓްނަޝިޕްތައް ހަދަމުން ނެވެ. ދިވެހި ކްލަބުތަކަށްވެސް މިފަދަ ޕާޓްނަޝިޕްތައް ހެދޭނެ އެވެ.
2018 ސާފްޗެމްޕިއަންޝިޕްގެ ތަށި ކާމިޔާބުކުރީ ދިވެހީން
ރާއްޖެއަކީ ޔޫރޮޕްގައި މަގްބޫލް ޓުއަރިޒް މަންޒިލެކެވެ. މިހަގީގަތުގެ އަލީގައި، ރާއްޖޭގައިވެސް ރަނގަޅު ފުޓުބޯޅަ ކްލަބްތަކެއް ގާއިމްކުރެވިއްޖެނަމަ، ޔޫރޮޕްގެ ކްލަބުތަކާ ޕާޓްނަޝިޕް ނުހެދޭންވީ ސަބަބެއް ނެތެވެ. ޓުއަރިޒަމަކީ އެ ސިނާއަތް މެދުވެރިކޮށް، ރާއްޖޭގެ ފުޓުބޯޅަ ކްލަބުތަކާއި، ޔޫރޮޕްގެ ކްލަބުތަކާއި، ރަނގަޅު ޕާޓްނަޝިޕުތައް މެދުވެރިކޮށްދެވޭނެ ސިނާއަތަކަށް ވީނަމަވެސް، މިއީ އެއްވެސް ސަރުކާރެއްގެ ސިޔާސަތެއްގައި ތަފްސީލްކުރެވިފައިިވާ ފިކުރަކަށް އަދި ނުވެދާނެ އެވެ.
މިފަދަ ޕާޓްނަޝިޕް އުފެއްދޭނީ، ދިވެހި ކްލަބަކީވެސް، ޔޫރޮޕްގެ ކްލަބަކާއި އެކު މަސައްކަތް ކުރެވޭ ފެންވަރަށް އިންތިޒާމްކުރެވިފައިވާ ކްލަބަކަށް ވެގެން ނެވެ. ހަރުދަނާ މެނެޖްމަންޓެއްގެ ދަށުން ރަނގަޅު ފުޓުބޯޅަ ތަސައްވުރެއް އޮންނަ ކްލަބަކަށް ވެގެން ނެވެ. ދިވެހި ކްލަބަކީވެސް، ގާނޫނީގޮތުން ސައްހަ، ފަންނީގޮތުން ހުށިޔާރު، ފައިސާގެގޮތުން، އިތުބާރު ކުރެވޭ އޮނިގަނޑެއްގެ ތެރެއިން ދެމެހެއްޓެނިވި ގޮތަކަށް ގާއިމްކުރެވިފައިވާ ކްލަބަކަށް ވާން ޖެހޭނެ އެވެ.
މަޝްހޫރު ފުޓުބޯޅަ ކުޅުންތެރިޔާ މޫސާ މަނިކު(ކުޑަ މޫސަ)
ދިވެހި ފުޓުބޯޅަ ތަރިން އުފައްދާ، ދެމެހެއްޓޭނެ މާހައުލެއް ގާއިމް ކުރެވޭނީ މިފަދަ ހަރުދަނާ ކްލަބަތަކެއް އުފެއްދިގެން ނެވެ. "ދަނޑުފޯރި" ގެއްލުނީ ފުޓުބޯޅަ މެނޭޖް ނުކުރެވިގެން ނެވެ. ރާއްޖެ ފަދަ ގައުމަކަށް ފުޓުބޯޅަ ކުރިއެރުވުމަށް މިހާރު އެންމެ ބޭނުންތެރި އެއްކަމަކަށް ވާނީ ރާއްޖޭގެ ކުރީގެ ފުޓުބޯޅަ ތަރިން އިސްނަގާ މިކަމަށް އެދެން ފެށުމުންކަމުގައި ދެކެވެވެ.
މެޗުތައް ކުޅޭއިރު ކުރިން ދަނޑަށް ވަންނަވަރަށް މިހާރު މީހުން ނުވަދޭ
މެޗުގެ ނަތީޖާ ކަށަވަރު ނުކުރެވޭ! ދެން ހަދާނީ ކިހިނެތް؟
މިއަދު، ރާއްޖޭގެ ފުޓުބޯޅަ މިއޮތީ، މެޗެއްގެ ނަތީޖާ ކަށަވަރު ނުކުރެވޭ ހިސާބަށް ވެއްޓިފަ އެވެ. ކުޅިވަރުގެ ފަލްސަފާ އާއި، ރޫހް ގެއްލިފަ އެވެ. ފެއަ ޕްލޭގެ ހަމަތަކުން ބޭރުވެ، ކުޅިވަރުގެ މުޅި ނިޒާމް ހަމައިން ނައްޓާފަ އެވެ. އެހެންނަމަވެސް، މިއީކީ ހަމައެކަނި ދިވެހިރާއްޖެއަށް ދިމާވެފައިވާ ކަމެއްވެސް ނޫނެވެ. މިއީ އެހެން އެތައް ގައުމުމަކަށްވެސް ދިމާވެފައިވާ ކަންކަމެކެވެ. ގާތުން ބަލާލުމުން އިންޑިއާ، އަދި ދުރަށް ބަލާލުމުން، ބްރެޒިލް، ފަދަ ގައުމުތައް މިސާލަކަށް ފުދޭނެ އެވެ. ފުޓުބޯޅައިގައި ކުރިއަރާފައިވާ ގައުމުތަކަކީ، މިތަޖުރިބާތައް ކޮށްފައިވާ ގައުމުތަކެވެ. މިމަރުހަލާ ކަޑަތުކޮށްފައިވާ ގައުމުތަކެވެ.
ވީމާ، ސުވާލަކީ، ފުޓުބޯޅަ މެނެޖްމަންޓް ފުރިހަމަކޮށް އިސްލާހްކުރަން ކުރެވޭނީ ކޮންކަމެއް ތޯއެވެ؟ ފަރުވާކުޑަ، ދެރަވަރު މެނެޖްމަންޓްގެ ސަބަބުން، ކުޅުމުގެތެރޭގައި ހިނގާ ހުދުމުހުތާރު ކަންކަން ހުއްޓުވާ، ފުޓުބޯޅަ، ހަމަމަގަށް އަޅުވާނީ ކިހިނަކުންތޯ ސުވާލު އުފައްދަން ޖެހެ އެވެ. މިއަދު، ރާއްޖޭގެ ސިޔާސީ ހަގީގަގަތަކީ، ފުޓުބޯޅަވެސް ކުރިއެރުވޭނީ ޑިމޮކްރެޓިކް މާހައުލެއްގެ ގެތެރެއިން ކަމެވެ. ވީމާ ޑިމޮކްރެޓިކް ވެއްޓެއްގައި، ރާއްޖޭގެ ފުޓުބޯޅަ، ދެންއޮތް މަރުހަލާއަށް ދަތުރުކުރާނީ ކިހިނަކުންތޯއެވެ؟
ނިމިގެން ދިޔަ ދެހަފްތާ ތެރޭ، އިންޑިއާގެ ފުޓުބޯޅަ އެސޯސިއޭޝަނުން ކުރި ތަޖްރިބާ ތަކަކީ ރާއްޖޭގެ ފުޓުބޯޅަ ލީޑަރުންނަށް އިބްރަތްތެރި ފިލާވަޅުތަކަކަށް ވާނެ އެވެ. އިންޑިއާގެ ޑިމޮކްރެޓިކް ނިޒާމުމުގެތެރެއިން އިންޑިއާގެ ފުޓުބޯޅަ، އާ ހިއްވަރަކާއެކު، އިހަށްވުރެ ފުރިހަމަ މެންޖްމަންޓް މޮޑަލްއަކަށް އަންބުރާލައި، އިންތިހާބުކުރެވުނީ ކިހިނަކުންތޯ ދެނެގަތުމަކީ، ރާއްޖޭގެ ކުޅިވަރު ލީޑަރުންނަށް ބޭނުންތެރި ކަމަކަށް ވާނެ އެވެ.
އިންޑިއާގެ ތަޖްރިބާ
ކުޅިވަރުގެ ރޫހް ގެއްލި، ހަކަތަ ހުސްވެ، ފިކުރު ހުސްވެ، އެންދުމަތިވެފައި އޮތް، އޯލް އިންޑިއާ ފުޓުބޯޅަ ފެޑެރޭޝަން، އާ ރޫހަކާއިއެކު ހަމަ އިސްކޮޅަށް ދެމިލި ހަބަރަކީ، ދުނިޔޭގެ ހުރިހާ ބޮޑެތި ކުޅިވަރު ސަފްހާތަކުން، ހެޑްލައިން ނިއުސް ގޮތުގައި، މިދިޔަ ދެހަފްތާތެރޭ ގެނެސްދިން ހަބަރެކެވެ. އިންޑިއާގެ ފުޓުބޯޅަ އެސޯސިއޭޝަންގެ އާ އިންތިހާބަށް ކުޅިވަރު މީޑިއާގެ ޝައުގުވެރިކަން ލިބެނީ، އިންޑިއާއަކީ ދުނިޔޭގެ އެންމެ ބިޔަ ޑިމޮކްރަސީ ކަމަށްވެފައި، އިންޑިއާއަކީ، ދުނިޔޭގެ ދެވަނައަށް އެންމެ ބޮޑު އާބާދީ ކަމަށް ވާތީ އެކަންޏެއް ނޫނެވެ.
އިންޑިއާގެ ފުޓުބޯޅަ އެސޯސިއޭޝަންގެ އިންތިހާބުގެ ހަބަރު، ހަބަރަކަށްވަނީ، ހިނގާދިޔަ ފަނަރަވަރަކަށް އަހަރު ތެރޭ އިންޑިއާގެ ކުޅިވަރު ދާއިރާ، ދުނިޔޭގެ ފެންވަރަށް ނެގުމަށް، އެގައުމުގެ ސަރުކާރުން ކުރި މަސައްކަތުގެ ސަބަބުން ނެވެ. އިންޑިއާގެ ސްޕޯޓްސް މިނިސްޓްރީން ސްޕޯޓްސް ކޯޑެއް އުފައްދާ، 2011 ވަނަ އަހަރު ތަމްފީޒުކުރަން ފެށީ އެ ނިޔަތުގަ އެވެ.
އިންޑިއާގެ ފުޓުބޯޅަ، ދުނިޔޭގެ ފެންވަރަށް ކުރިއަށް ޖެހެން ފެށުމަކީ، ރާއްޖެއަށް މިކަމުގެ ފައިދާ ނެގޭނެވެސް ކަމެކެވެ. ސަރަހައްދުގެ ޗެމްޕިޔަންކަމަށް، އަޅުގަނޑުމެން، ވާދަކުރަނީ އިންޑިއާ އާއި އިދިކޮޅަށެވެ. ރާއްޖޭގެ ފުޓުބޯޅަ ލީޑަރުން މިއަދު، މިކަމާއި ނުއުޅެފިނަމަ، ކައިރި މުސްތަގްބަލުގައި، ރާއްޖެ ދެން ވާދަކުރަންޖެހޭނީ، އިންޑިއާ އާއި ބަންގްލަދޭޝްގެ ފަހަތުން، ތިނެއް ނުވަތަ ހަތަރު ވަނަ ސްލޮޓަށް ނޭޕާލް އާއި ޕާކިސްތާނާއި ކަމަށް ވުމަކީ ގާތްކަމެކެވެ.
އިންޑިއާގައި މައްސަލަ ފުރަތަމަވެސް ވަނީ ކޯޓަށް
އިންޑިއާގެ ފުޓުބޯޅަ އެސޯސިއޭޝަންގެ އިންތިހާބު ހިންގަނީ، އެ އެސޯސިއޭޝަންގެ އަސާސީ ގަވާއިދާއި އަދި އިންޑިއާގެ ސްޕޯޓްސް ކޯޑާއި ހިލާފަށް ކަމަށް ތުހުމަތުކޮށް، 2016 ގައި "ޑެެލްހީ ފުޓްބޯލް ކްލަބް" އިން ކޯޓަކަށް މައްސަލައެއް ހުށަހެޅި އެވެ. ފީފާ އިން އަބަދުވެސް ބުނަމުން ގެންދަނީ ފުޓުބޯޅައިގެ މައްސަލަތައް ކޯޓަށް ހުށަނޭޅުމަށެވެ. އެހެންނަމަވެސް ފީފާއަކަށް ކޯޓަށް މައްސަލަ ހުށަހެޅުމެއް ނުހުއްޓުވެ އެވެ. އިންޑިއާއަކީ މިފަދަ މިސާލެކެވެ.
ފުޓުބޯޅައިގެ މައްސަލަތައް ކޯޓަށް ހުށަހެޅުން ނުހުއްޓުވެނީ، ހުދު ފީފާއަށް ވެސް، މެމްބަރު ގައުމުތަކުގެ ގާނޫނީ ސައްހަކަން ޔަގީންކޮށް ނުދެވޭތީ އެވެ. ފީފާއިން އަބަދުވެސް ބުރަވަނީީ، އެވަގުތެއްގައި އެސޯސިއޭޝަންގައި ތިއްބެވި ވެރިންގެ ކޮޅަށެވެ. މިސާލަކަށް ރާއްޖޭގެ ފުޓުބޯޅަ އެސޯސިއޭޝަނުން ބުނަނީ، ސަރުކާރުން އެ އެސޯސިއޭޝަންގެ އިންތިހާބު ކަށަވަކުރަން އުޅެއްޖެނަމަ، އެއީ ތިންވަނަ ފަރާތެއްގެ ނުފޫޒު ފޯރުވުންކަމަށެވެ. އަދި، މިސަބަބަށް ޓަކާ، ފީފާއިން ރާއްޖެ ސަސްޕެންޑް ކުރާނެ ކަމަށެވެ.
އެސޯސިއޭޝަންގެ ވެރިން ސަރުކާރަށް މިދައްކާބިރު، ސަރުކާރުން ބަލައިގަނެ އެވެ. ނަތީޖާއަކީ، މި ރައުޔޫއަކީ، ރައްޔިތުންގެ މަޖިލިހުގެ އިޖްތިމާއީ ކޮމިޓީގެވެސް ރައުޔޫކަމަށް ވުމެވެ. މަޖިލީހުގެ 35 މެމްބަރުންގެ ތާއީދު ލިބުނީ އެފްއޭއެމްގެ އިންތިހާބު، ހިންގަނީ ޑިިމޮކްރެޓިކް ހަމަތަކާއި އެއްގޮތަށްކަމަށް ކަށަވަރުކުރަން އުޅުމަކީ "ރަނގަޅުކަމެއް ނޫން" ކަމަށެވެ. "ބުއްދިވެރިކަމެއް ވެސް ނޫން" ކަމަށެވެ؟
ރާއްޖޭގެ އެސޯސިއޭޝަނުން މިދައްކާ ބިރަށް، ރާއްޖޭގެ މަޖިލިހާއި ސަރުކާރުން ދީލާލި ނަމަވެސް، އަވަށްޓެރި އިންޑިއާގެ މަޖިލީހާއި ސަރުކާރަކުން ސަސްޕެންޝަންގެ ބިރަށް ރާއްޖެ ދީލާލި ގޮތަށް ދީލައެއް ނުލި އެވެ. އިންޑިއާއިން ނިންމީ ފީފާ ޓެސްޓު ކުރާށެވެ. އެގައުމެ ކޯޓުތަކުންވެސް ފީފާ ދެއްކި ބިރަކަށް އަޅައެއް ނުލި އެވެ. އެންމެ ފަހުން، ފީފާ އިން އިންޑިއާ ސަސްޕެންޑް ކުރީ އެވެ.
ކޯޓާއި ހިސާބުން 2016 ވަނަ އަހަރު އުފެދުނު މައްސަލަ، ހަ އަހަރުފަހުން، ސުޕްރީމް ކޯޓަށް ވަދެ، އެންމެ ފަހުން ނިމިގެން މިދިޔައީ، ސަރުކާރާއި، ފީފާ އާއި ދެމެދު ވާހަކަ ދެކެވިގެން ނެވެ. ފީފާގެ އެދުމާއި އެއްގޮތަށް، ސުޕްރީމް ކޯޓުގެ ކޮމިޓީ އޮޕް އެޑްމިނިސްޓަރޭޝަން އުވާލައި، ޖެހިގެން އައި ހަފްތާގައި، ފީފާގެ ސްސަޕެންޝަންވެސް އަނބުރާ ގެންގޮސްގެނެވެ.
އާ އަސާސީ ގަވާއިދެއްގެ ދަށުން، ދެފުއް ފެންނަ އިންތިހާބަކުން އިންޑިއާގެ މުޅިން އާ ފުޓުބޯޅަ ރިޔާސަތެއް ގާއިމްކޮށްގެނެވެ. މި އިންތިހާބު ހިނގާ ދިޔައީ މިދިޔަ ހުކުރުދުވަހު އެވެ. އިންޑިއާއަށް ވީ ގެއްލުމެއް ނެތެވެ. ބޮޑުތަނުން ވީ ފައިދާ އެވެ.
މަޝްހޫރު ފުޓުބޯޅަ ލެޖަންޑް، ބައިޗުންގް ބުޓިޔާ ބަލިކޮށް، އޭނާގެ ޓީމް މޭޓް، ގޯލްކީޕަރު ކަލްޔަން ޗައުބޭ، އެސޯސިއޭޝަންގެ ރައީސްކަމަށް ހޮވުނީ 33-1 ވޯޓުގެ ލޭންޑް ސަލައިޑަކުން ނެވެ. އާ އަސާސީ ގަވާއިދުގެ ދަށުން، ވޯޓު ދޭން ތިބީ އިންޑިއާގެ 36 ސްޓޭޓް ގެ މަންދޫބުން ނެވެ. ހަގީގީ، އޯލް އިންޑިއާ ފުޓްބޯލް ފެޑެރޭޝަން ވުޖޫދަށް މިއައީ އަދި ކިރިޔާ އެވެ. އިންޑިއާގެ ފުޓުބޯޅަ ޓީމް ބަލިކުރުމަކީ ރާއްޖެއިން އަބަދުވެސް އުއްމީދު ކުރާ ކަމެކެވެ.
އިންޑިއާގެ ފުޓުބޯޅަ އެސޯސިއޭޝަން ހަމަމަގަށް އެޅުވީ، ކޯޓުތަކާއި، ސަރުކާރުން
އިންޑިއާގައި ކަންހިގާ ދިޔައީ ރާއްޖޭގައި ކަންހިގާ ދިޔަގޮތާއި ދިމާ އިދިކޮޅަށެވެ. އިންޑިއާ ސަރުކާރުން ބޭނުންވީ އިންޑިއާގެ ފުޓުބޯޅަ ބައިނަލް އަގުވާމީ ފެންވަރަށް ތަރައްގީކުރާށެވެ. އެއިރު، އިންޑިއާގެ އެސޯސިއޭޝަން އޮތީ ހޭނެތިފަ އެވެ.
ދިވެހި ސަރުކާރުންވެސް ބުނަނީ ފުޓުބޯޅަ ކުރިއަރުވަން ބޭނުން ކަމަށެވެ. ރާއްޖޭގެ އެފްއޭއެމް ވެސް އޮތީ ހަމަ އިންޑިއާގެ އެސޯސިއޭޝަނެކޭ އެއް ހާލުގަ އެވެ.
އެހެން ނަމަވެސް، ރާއްޖެއާއި ހިލާފަށް، އިންޑިއާ ސަރުކާރުން ނިންމީ އިންޑިއާގެ ފުޓުބޯޅަ އެސޯސިއޭޝަންގެ އިންތިހާބު ސައްހަކުރުމުގެ މަސައްކަތުގައި ފީފާ އާއި ކުރިމަތިލާން ޖެހިއްޖެ ހާލަތެއްގައި، އެކަން ވެސް ކުރާށެވެ. އިންޑިއާ ސަރުކާރުގެ އިސްތިރާޖީއަކީ، ފީފާ، ނެގޯސިއޭޝަން މޭޒުދޮށަށް ގެނައުމެވެ. އަދި ވާހަކަ ދައްކައިގެން މައްސަލަ ހައްލުކުރުމެވެ.
އިންޑިއާއާއި ހިލާފަށް، ރާއްޖެއިން ނިންމީ މައަސަލައާއި ކުރިމަތިނުލާ، މައްސަލައިން ރެކޭށެވެ. އިޖްތިމާއީ ކޮމިޓީން ނިންމެވީ ފީފާގެ ސަސްޕެންޝަންގެ ބިރަށް، ފުޓުބޯޅަ އާއި އަޅާ ނުލުމަށެވެ. އެއީ ސަރުކާރުންވެސް އެދުނުގޮތްކަމަށް ވާނެ އެވެ. މި ސިޔާސަތު ބަދަލުވެގެން ނޫނީ ދެން ރާއްޖޭގައި ދަނޑުފޯރިއެއް ނުފެންނާނެ އެވެ.
އެޑިޓަރުގެ ނޯޓް:
ހާމިދު އަބްދުލްޣަފޫރަކީ ކުޅިވަރު ހިންގުމުގެ ދާއިރާ އިން މަތީ ތައުލީމު ހާސިލް ކުރައްވައި އަދި އެ ދާއިރާއިން އަމަލީ ގޮތުން އެތައް ތަޖުރިބާތަކެއް ހޯއްދަވައިގެން ހުންނެވި ބޭފުޅެކެވެ. ހާމިދު ޢަބްދުލްޣަފޫރަކީ، ފުޓްބޯޅަ އެސޯސިއޭޝަން އޮފް މޯލްޑިވްސްގެ ސެކެއްޓްރީ ޖެނެރަލްކަމުގެ އިތުރުން ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު ކަން ކުރައްވާފައިވާ ބޭފުޅެކެވެ. އަދި ހާމިދަކީ މިހާރު ވެސް ދިވެހި ރާއްޖޭގެ ގައުމީ ޔުނިވަސިޓީގެ ކައުންސިލްގައި ސްޕޯޓްސް، އާޓްސް އެންޑް ކަލްޗާގެ ދާއިރާގެ ބޭފުޅެއްގެ ހައިސިއްޔަތުން އިންނަވާ ބޭފުޅެކެވެ.
