ޖައިޝަންކަރު ރާއްޖެ ވަޑައިގެންނެވިއިރު، މިއީ ރައީސް، ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގެންނެވި ފަހުން އިންޑިއާގެ މަތީ ފެންވަރުގެ ބޭފުޅަކު ރާއްޖެ ވަޑައިގަންނަވާ ދެވަނަ ފަހަރެވެ.
މިދިޔަ ހުކުރު ދުވަހު ރާއްޖެ ވަޑައިގެންނެވި ޖައިޝަންކަރުގެ ދަތުރު ނިންމަވާލެއްވުމަށް ފަހު މިއަދު ފުރާވަޑައިގަތީ އައްޑޫގައި އިންޑިއާގެ ލޯނުން ހަރަދުކޮށްގެން ކުރިއަށް ގެންދާ މަޝްރޫއުތަކުގެ ތެރެއިން މިހާރު ނިމިފައިވާ ދެ މަޝްރޫއު ދިވެހި ސަރުކާރާ ހަވާލު ކުރުމަށް ބޭއްވި ރަސްމިއްޔާތުގައި ބައިވެރިވެވަޑައިގަތުމަށް އައްޑުއަށް ވަޑައިގަތުމަށް ފަހު އެ ތަނުންނެވެ.
ޖައިޝަންކަރުގެ ތިން ދުވަހުގެ ރަސްމީ ދަތުރުގައި އޭނާ ވަނީ ރައީސް ޑރ. މުހައްމަދު މުއިއްޒު، ފޮރިން މިނިސްޓަރު ޒަމީރު، ޑިފެންސް މިނިސްޓަރު ގައްސާން މައުމޫން އާ ބައްދަލުކުރައްވާފަ އެވެ. މި ދަތުރުގައި ދެ ގައުމުގެ ދެމެދު ރަސްމީ މަޝްވަރާތައް ބާއްވާ ދެ އެއްބަސްވުމެއްގައި ސޮއިވެސްކޮށްފައިވެ އެވެ. އިދިކޮޅު މައި ޕާޓީ އެމްޑީޕީގެ ރައީސް އަބްދުﷲ ޝާހިދު އާވެސް އޭނާ ރޭ ބައްދަލުކުރެއްވި އެވެ.
މާލެ ސަރަހައްދުގައި އިންޑިއާގެ އެހީގައި ކުރިއަށްގެންދާ އެންމެ ބޮޑު މަޝްރޫއު، ތިލަމާލެ ބުރިޖުގެ މަޝްރޫއުގެ މަސައްކަތް ބައްލަވާލަން ވެސް ޖައިޝަންކަރު އިއްޔެ ވަޑައިގެންނެވި އެވެ.
އިންޑިއާގެ އެންމެ ނުފޫޒުގަދަ އެއް ވަޒީރު ރާއްޖެ ވަޑައިގެންފައި މިވަނީ އެ ގައުމާއެކު އޮތް ޒަމާނީ ގުޅުމަށް މި ސަރުކާރުގެ ކުރީކޮޅު އެރި ލޮޅުމުން އަރައިގަތުމަށް ސަރުކާރުން ގިނަ މަސައްކަތްތަކެއް ކުރަމުންދާ ދަނޑިވަޅެއްގަ އެވެ.
- އިތުރަށް ކިޔާލަން: އިންޑިއާ އަކީ ރާއްޖޭގެ ގާތް އެކުވެރިޔެއް، އަދި އަގު ނުކުރެވޭ ބައިވެރިއެއް: ރައީސް
މި ސަރުކާރު ހިންގާ ޕީއެންސީ އިދިިކޮޅުގައި އޮތްއިރު ހިންގި "އިންޑިއާ އައުޓް" ކެމްޕޭނާއި އަދި ސަރުކާރުގެ ކުރީކޮޅު ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކުރުމުގެ ސަބަބުން ދެ ގައުމުގެ ހާރިޖީ ގުޅުން ވަރަށް ބޮޑަށް ގޯސްވި އެވެ. އޭގެ ފަހުން، ރައީސް ޗައިނާއަށް ކުރެއްވި ފުރަމާނަ ދަތުރުފުޅަށް ފަހުގައި ވެސް އިންޑިއާއަށް އަމާޒުކޮށް ބަހުގެ ހަމަލާތަކެއް ރައްދުކުރެއްވި އެވެ.
އެކަމަކު، އޭގެ ފަހުން ދެ ގައުމުގެ ގުޅުން ވަނީ ރަނގަޅުވެފަ އެވެ. އެ ގޮތުން، ރާއްޖޭގެ ފޮރިން މިނިސްޓަރު މޫސާ ޒަމީރުގެ ދަތުރުފުޅަށް ފަހުގައި ދެ ގައުމުގެ ގުޅުން ރަނގަޅުވަމުން އަންނަ ކަމަށް މީގެ ކުރިން އިންޑިއާގެ ފޮރިން މިނިސްޓަރު ވިދާޅުވި އެވެ.
